ضلعی انتظامیہ لاہور نے پاکستان تحریک انصاف (پی ٹی آئی) کو ریلی کی مشروط اجازت دے دی۔

تفصیلات کے مطابق پی ٹی آئی کی لاہور میں ریلی کی اجازت 25 شرائط سے مشروط کی گئی ہے۔

ضلعی انتظامیہ کا کہنا ہے کہ لاہور ریلی میں اداروں عدلیہ کے خلاف تقاریر نہیں ہو نگی اور وال چاکنگ کی اجازت نہیں ہو گی۔

ضلعی انتظامیہ کے مطابق لاہور ریلی میں اسلحہ ڈنڈے نہیں لایا جائے گا جبکہ ریلی کی اجازتِ دوپہر 2 بجے سے ساڑھے 5 بجے تک ہو گی۔

اسکولز اور کالجز جلدی بند کرنے فیصلہ

دوسری جانب پی ٹی آئی ریلی کے پیش نظر کمشنر لاہور چوہدری محمد علی رندھاوا نے ریلی کے روٹ میں آنے والے تمام اسکولز اور کالجز دوپہر 12بجے بند کرنے کا حکم دے دیا۔

کمشنر لاہور نے سیکیورٹی تھریٹ کے باعث ریلی کے روٹ میں آنے والی تمام دکانیں اور بازار کو بھی 12 بجے کے بعد بند کرنے کا حکم دیا۔

کمشنر لاہور کی جانب سے سیکریٹری اسکولز، ہائر ایجوکیشن، ڈپٹی کمشنر لاہور اور سیکریٹری آئی اینڈ سی کو بھی آگاہ کردیا گیا ہے۔

ریلی شیڈول

پاکستان تحریک انصاف کے چیئرمین عمران خان کی قیادت میں انتخابی ریلی اقبال روڈ، سرکلر روڈ، شاہ عالم چوک سے ہوتے ہوئے داتا دربار پہنچے گی۔

پاکستان تحریک انصاف کی انتخابی ریلی دوپہر 2 بجے زمان پارک سے شروع ہوگی اور گڑھی شاہو سے ہوتی ہوئی ریلوے اسٹیشن سے شاہ عالمی مارکیٹ سے داتا دربار پہنچ کر اختتام پذیر ہوگی۔

ٹریفک کی روانی برقرار رکھنے کے لیے پروگرام ساڑھے 5 بجے تک ختم کرنا ہوگا تاہم سیکیورٹی کو بہتر رکھنے کے لیے پی ٹی آئی فوکل پرسن ضلعی انتظامیہ سے تعاون کریں گے۔

استقبالیہ کیمپ لگانے کی اجازت نہیں ہوگی اور نہ ہی راستے سے کسی جلوس کو ریلی میں شامل کیا جائے گا۔

واضح رہے کہ گزشتہ روز سابق وزیر اعظم عمران خان نے تحریک انصاف کی انتخابی ریلی کل تک  ملتوی کرنے کا اعلان کیا تھا۔

 اپنے ایک بیان میں عمران خان نے کہا تھا کہ ایسا لگتا ہے دفعہ 144 صرف پی ٹی آئی پر لگائی گئی، لاہور میں دیگر جماعتوں کی تمام سرگرمیاں جاری ہیں، ارکنان سے درخواست ہے اس جال میں نہ پھنسیں، زمان پارک کو کنٹینرز، پولیس کی بھاری نفری نے گھیر لیا۔

سابق وزیر اعظم نے مزید کہا تھا کہ انتخابات ملتوی کرنے کے بہانے ڈھونڈ رہے ہیں، الیکشن شیڈول کے بعد دفعہ 144کیسے لگ سکتی ہے؟