وفاقی وزیر اطلاعات مریم اورنگزیب نے کہا ہے کہ عمران خان جلسوں کیلئے فٹ اور عدالتوں کا سامنا کرنے کیلئے ان فٹ ہیں۔

مریم اورنگزیب نے لاہور میں میڈیا سے گفتگو کرتے ہوئے کہا کہ ایک شخص پورے ملک کو کہتا ہے خوف کے بت توڑ دو، جب یہ جلسے میں جاتا ہے تو بلٹ پروف کنٹینر میں تقریر کرتا ہے۔

انہوں نے کہا کہ عالمی سازش کا بیانیہ بنایا گیا اور وہی سازش نواز، شہباز اور پھر محسن نقوی تک پہنچ گئی، عمران خان کے سارے مسئلے نفسیاتی ہیں۔

مریم اورنگزیب نے کہا کہ وہ کون لوگ ہیں جو اس شخص پر یقین رکھتے ہیں، کل لاہور کے لوگوں نے اس شخص کو مسترد کردیا۔

وفاقی وزیر نے کہا کہ سائفر کا بیانیہ ڈوبنے لگا تو کہا لانگ مارچ کروں گا، لانگ مارچ کے بعد کہا جیل بھرو تحریک شروع کروں گا اور اب کہتا ہے الیکشن کرانا چاہتا ہوں۔

انکا کہنا ہے کہ تم الیکشن نہیں پھر سے اپنی سلیکشن کرانا چاہتے ہو، تم چاہتے ہوعدالتی کٹہرے اور جواب دینے سے بچ جاؤں۔

انہوں نے کہا کہ عدالت نہیں جاؤں گا قتل کا خطرہ ہے مگر جلسہ کرنے جانا ہے، عدالت میں توشہ خانہ، فارن فنڈنگ کا جواب دینا ہے وہاں نہیں جاتا۔

مریم اورنگزیب نے کہا کہ عمران خان کی ذہنیت پر ملک کا آئین اور قانون نہیں چل سکتا، کیا انڈے، کٹے اور مرغیوں سے معیشت ٹھیک کرو گے؟

وفاقی وزیر نے کہا کہ 10سال میں کے پی میں یہ سب کچھ کیوں نہیں کیا؟ کہتا ہے ڈیٹا بیس بناؤں گا جس سے سب کو ٹارگٹڈ سبسڈی ملے گی، ٹارگٹڈ سبسڈی 10سال کے پی، 4سال وفاق، پنجاب میں نہ دی۔

انکا کہنا ہے کہ 2014 میں نوازشریف کے صحت کارڈپ روگرام کو اپنا پروگرام بنالیا، نوازشریف کے یوتھ پروگرام کو جوان پروگرام بنا کر چلادیا۔

انہوں نے کہا کہ کہتا ہے ہاؤسنگ اسکیم کیلئے قرضے دیں گے، 50 لاکھ گھر جو آپ القادر ٹرسٹ کے نام پر کھا گئے، ایک کروڑ نوکری کے بجائے ایک کروڑ بےروزگار کر گئے، تمہارے 10 نکاتی ایجنڈے پر تمہیں 10 تھپڑ مارنے چاہئیں۔

مریم اورنگزیب نے کہا کہ کہتا ہے منی لانڈرنگ پر قابو پائیں گے، پہلےفارن فنڈنگ کا تو جواب دو، پرائیویٹ جیٹ پر پیسے باہر بجھوانے والا کہتا ہے منی لانڈرنگ روکوں گا۔

وفاقی وزیر نے مزید کہا کہ 10 نکاتی ایجنڈا نہ بتاؤ صرف ایک منصوبہ بتاؤ جو مکمل کیا ہو، لوٹ مار، خزانے خالی کر کے دہشت گردی واپس لائے، سب جگہوں سے ناکامی کے بعد کہتا ہے میں ملنے کو تیار ہوں، عمران خان اب آپ سلیکٹ اور نا ہی الیکٹ ہوکر آسکتے ہیں۔