پاکستان تحریک انصاف (پی ٹی آئی) نے لاہور میں دفعہ 144 کے خلاف الیکشن کمیشن آف پاکستان سے رجوع کرنے کا فیصلہ کرلیا۔

تفصیلات کے مطابق رات گئے زمان پارک میں پاکستان تحریک انصاف کی سینئر لیڈر شپ کا ہنگامی اجلاس منعقد ہوا جس میں دفعہ 144 کیخلاف فوری طور پر الیکشن کمیشن سے رجوع کرنے کا فیصلہ کیا گیا۔

پی ٹی آئی کے سینئر رہنماؤں نے اجلاس میں گفتگو کرتے ہوئے کہا کہ الیکشن شیڈول کے اعلان کے بعد الیکشن ریلی روکنا آئین شکنی ہے، کسی کو آئین سے کھلواڑ نہیں کرنے دیا جائے گا۔

فواد چوہدری نے کہا کہ الیکشن کمیشن سے  درخواست کی جائے گی کہ الیکشن شیڈول کا اعلان ہونے کے بعد دفعہ 144 کا نفاز غیر قانونی ہے۔

عمران خان کا ڈاکٹر بابر اعوان سے رابطہ

دوسری جانب پاکستان تحریک انصاف کے چیئرمین عمران خان نے ڈاکٹر بابر اعوان سے رابطہ کر کے لاہور میں دفعہ 144 کو الیکشن کمیشن میں چیلنج کرنے ہدایت کردی۔

سابق وزیر اعظم عمران خان کی ہدایت پر تحریک انصاف کے وکیل بابر اعوان نے پٹیشن تیار کرلی جو 10 بجے الیکشن کمشن میں دائر جائے گی۔

بابر اعوان نے درخواست میں کہا کہ الیکشن کمیشن دفعہ 144 کے نفاذ کو ختم کرے، لاہور میں تحریک انصاف کی ریلی پر دفعہ 144 کا نفاذ غیر قانونی ہے۔

درخواست کے مطابق پنجاب حکومت دفعہ 144 کا نفاذ کرکے سپریم کورٹ کے فیصلے کے پیرا 15 کی خالف ورزی کررہی ہے۔ پنجاب حکومت پی ایس ایل میچ کو جواز بنا کر ریلی کو روکنے کی کوشش کررہی ہے۔

درخواست میں کہا گیا کہ تحریک انصاف کی ریلی اور پی ایس ایل کے میچ کا روٹ مختلف ہے۔ تحریک انصاف کی ریلی ساڑھے پانچ بجے ختم ہوگی جبکہ پی ایس ایل کا میچ سات بجے شروع ہوگا! اس سے پہلے کسی شہر میں پی ایس ایل کے دوران دفعہ 144 کا نفاذ نہیں کیا گیا۔

بابر اعوان نے درخواست میں مزید لکھا کہ الیکشن کمپین تحریک انصاف کا آئینی حق ہے، پنجاب حکومت غیر قانونی طور پر تحریک انصاف کی الیکشن کمپین کو روک رہی ہے!