حکومت پنجاب نے زمان پارک میں پاکستان تحریک انصاف (پی ٹی آئی) کے کارکنان کی جانب سے ایلیٹ فورس کی ٹیم اور گاڑی پر حملہ کرنے والوں کے خلاف سخت کارروائی کا فیصلہ کرلیا۔

پنجاب حکومت کے ترجمان نے کہا ہے کہ کینال روڈ، زمان پارک میں ایلیٹ فورس کی ٹیم اور ان کی گاڑی پر حملہ کرنے والے ان تمام شرپسندوں کے خلاف سخت کارروائی کی جائے گی۔

واضح رہے کہ پاکستان تحریک انصاف (پی ٹی آئی) کے کارکنان نے رات گئے ایلیٹ فورس کی گاڑی پر حملہ کر دیا تھا۔

مشتعل مظاہرین کے ہتھے چڑھنے والی ایلیٹ فورس کی گاڑی کینال روڈ سے گزر رہی تھی، گاڑی کو زمان پارک کے سامنے پہنچنے پر ڈنڈا بردار فورس نے روک لیا تھا۔

ایلیٹ فورس کی گاڑی عمران خان کی سیکیورٹی کے لیے زمان پارک پہنچی تھی، جہاں پی ٹی آئی کے ڈنڈا بردار کارکنوں نے حملہ کر دیا اور گاڑی کو نقصان پہنچایا۔

دوسری جانب پنجاب حکومت کی جانب سے پی ٹی آئی کو 19 مارچ کے جلسے کی اجازت نہ دینے کا فیصلہ کیا گیا ہے۔

اس حوالے سے ذرائع کا کہنا تھا کہ تحریک انصاف کی جانب سے 19 مارچ بروز اتوار کو مینار پاکستان کے مقام پر جلسہ کرنے کا اعلان کیا گیا تھا جسے فی الحال لاہور ہائی کورٹ کی جانب سے روک دیا گیا ہے۔

بعدازاں پنجاب حکومت نے بھی اس معاملے پر پی ٹی آئی کو اجازت نہ دینے کا فیصلہ کرلیا۔

صوبائی حکومت کے مطابق تحریک انصاف کو جلسے یا ریلی کی اجازت نہیں دی جائے گی  جبکہ اتوار کو ریلی نکالی گئی تو دفعہ 144 نافذ کردی جائے گی۔

یہ بھی پڑھیں: لاہور ہائی کورٹ نے تحریک انصاف کو اتوار کے جلسے سے روک دیا

خیال رہے کہ لاہور ہائی کورٹ نے سابق وزیراعظم عمران خان کی گرفتاری کے لیے پولیس آپریشن پر روک میں مزید ایک دن کی توسیع کرتے ہوئے پاکستان تحریک انصاف (پی ٹی آئی) کو اتوار کو مینار پاکستان پر جلسہ کرنے سے بھی روک دیا تھا۔

واضح رہے کہ عمران خان نے اتوار (19 مارچ) کو لاہور میں مینار پاکستان (گریٹر اقبال پارک) میں ایک تاریخی جلسے کا بھی اعلان کیا تھا تاکہ سیکیورٹی خدشات کے باوجود پارٹی کی انتخابی مہم شروع کی جا سکے۔