مسلم لیگ (ن) کے قائد نواز شریف کی ممکنہ وطن واپسی کے معاملے پر افواہیں اور خدشات دم توڑنے لگے، نواز شریف کی وطن واپسی حقیقت کا روپ دھارنے لگی۔

پارٹی ذرائع نے بتایا کہ پاکستان مسلم لیگ ن نے نواز شریف کے استقبال کی باقاعدہ تیاریوں کی ہدایات جاری کر دی ہیں، ان کی واپسی پر شاندار استقبال کا ٹاسک چیف آرگنائزر مریم نواز کو دے دیا گیا ہے۔

ذرائع کے مطابق مریم نواز ملک بھر سے آنے والی استقبالی ریلیوں کی خود نگرانی کریں گی جبکہ اس حوالے سے مسلم لیگ ن پنجاب کی جانب سے تمام ڈویژنل صدور و جنرل سیکریٹریز کو باقاعدہ مراسلہ جاری کر دیا گیا اور تمام سٹی صدور و جنرل سیکریٹریز اور یونین کونسل صدور و جنرل سیکرٹریز کو بھی مراسلہ جاری کردیا ہے۔

ذرائع کا کہنا ہے کہ پارٹی کے تمام ونگز کے عہدیداروں کو بھی نواز شریف کے استقبال کے لئے تیاریاں مکمل کرنے کی ہدایت کردی ہے جبکہ تمام موجودہ اراکین قومی اسمبلی و سابق اراکین صوبائی اسمبلی، سابقہ بلدیاتی نمائندوں اور ٹکٹ ہولڈرز کو بھی تیاریاں کرنے کی ہدایت کی گئی ہے۔

پارٹی ذرائع نے مزید بتایا کہ نواز شریف کی وطن واپسی کی تاریخ کا اعلان مریم نواز خود پرہجوم پریس کانفرنس میں کریں گی۔

یہ بھی پڑھیں: انتخابات کا دنگل بج گیا، ن لیگ سرگرم؛ نواز شریف نے اہم فیصلہ کرلیا

اس سے قبل مسلم لیگ ن کے قائد نواز شریف نے سعودی عرب سے پاکستان میں اپنے بااعتماد ساتھیوں سے ٹیلی فونک رابطے کیے تھے اور موجودہ و سابق اراکین سینٹ و قومی اسمبلی سے اپنی وطن واپسی اور پارٹی امور پر مشاورت کی تھی۔

مسلم لیگ ن کے ذرائع نے بتایا تھا کہ کچھ رہنماؤں اور قریبی ساتھیوں نے نواز شریف کو 14 اگست کو وطن واپسی کا مشورہ دیا جبکہ نواز شریف کے قریبی ساتھیوں کی اکثریت نے ستمبر کے وسط میں واپسی کا مشورہ دیا۔