وفاقی وزیر اطلاعات مریم اورنگزیب نے کہا ہے کہ ملک کی مشکلات کا حل صرف نواز شریف کے پاس ہے۔

مریم اورنگزیب نے  پریس کانفرنس کرتے ہوئے کہا کہ آج 5 جولائی کے دن وزیراعظم شہید ذوالفقار علی بھٹو کی حکومت پر شب خون مار کر ایک آمر نے جمہوریت کا قتل کیا تھا، آج کیپٹن کرنل شیر خان شہید کی برسی کا بھی دن ہے۔

انہوں نے کہا کہ آج سی پیک کے دس سال مکمل ہو رہے ہیں، سی پیک پاکستان اور چین کی قیادت کا خطے کے لئے ایک تحفہ ہے، سی پیک کا تحفہ قائد محمد نواز شریف اور صدر شی جن پنگ کا وژن ہے، سی پیک منصوبے نے پاکستان کو 2013ءسے لے کر 2018ءتک ہر شعبے میں ترقی دینے کا کردار ادا کیا۔

مریم اورنگزیب نے کہا کہ پچھلے ایک سال سے اتحادی حکومت ملک کی معاشی تباہی، بدحالی، بے روزگاری، لوڈ شیڈنگ اور دہشت گردی ختم کرنے کی کوشش کر رہی ہے، پچھلے 4 سالوں میں نالائق، نااہل اور چوروں نے ملک کو صرف تباہی کی طرف دھکیلا۔

انکا کہنا ہے کہ کچھ سازشی کرداروں نے ایک نااہل اور چور کو ملک پر مسلط کیا، یہ کہانی صرف چار سال کی نہیں، اس کی شروعات 2013ء میں شروع ہو چکی تھی،  2013ء میں ملک کے اندر مہنگائی، دہشت گردی اور بے روزگاری تھی، ملک ڈیفالٹ کی نہج پر تھا۔

وفاقی وزیر نے کہا کہ لوگوں نے سمجھ لیا تھا کہ ملک کی مشکلات کا حل صرف نواز شریف کے پاس ہے، جب پاکستان ایک مشکل دوراہے سے گزر رہا تھا، اس وقت نواز شریف کو تیسری مرتبہ وزیراعظم منتخب کیا گیا۔

انہوں نے کہا کہ نواز شریف نے ہی ملک کے اندر سیاسی استحکام کی بنیاد رکھی، صوبوں میں اکثریت رکھنے والی جماعتوں کو وہاں حکومتیں بنانے کا موقع دیا۔

مریم اورنگزیب نے کہا کہ نواز شریف ملک کے نوجوانوں کو خودمختار بنانا چاہتے تھے، وہ ملک کے اندر آئی ٹی، زراعت، برآمدات کو فروغ دینا چاہتے تھے، نواز شریف ملکی معیشت کو استحکام دینا چاہتے تھے اور کر کے دکھایا، صرف نعرے نہیں لگائے تھے۔

وفاقی وزیر اطلاعات نے مزید کہا کہ نواز شریف کے خلاف اس لئے سازش کی جا رہی تھی کہ وہ عوام کو روزگار اور کاروبار دے رہے تھے، ملک سے اندھیروں کا خاتمہ کر رہے تھے۔