اسلام آباد: نگران وزیر مذہبی امور انیق احمد نے وزارت آئی ٹی و ٹیلی کمیونیکیشن کے تعاون سے حج آپریشن مکمل ڈیجیٹلائزڈ کرنے کا فیصلہ کیا ہے۔

تفصیلات کے مطابق نگران وزیر آئی ٹی ڈاکٹر عمر سیف کی صدارت میں وزیراعظم کی قائم کردہ خصوصی کمیٹی کا اہم اجلاس ہوا جس میں حج آپریشن سے متعلق تفصیلی گفتگو کی گئی۔

اجلاس میں وزارت انفارمیشن ٹیکنالوجی کی مدد سے حج آئی ٹی سسٹم میں بہتری اور اصلاحات لانے پر اتفاق کیا گیا تاکہ حجاج کرام کو بہتر سے بہتر سہولیات اور شکایات کے ازالہ کے نظام کو تیز تر کیا جائے۔

وزیر مذہبی امور انیق احمد نے اجلاس میں گفتگو کرتے ہوئے کہا کہ حج آپریشن کو مکمل ڈیجیٹلائزڈ اور اینڈ ٹو اینڈ پیپر لیس کرنا چاہتے ہیں۔ حجاج کی آسانی کیلئے لائیو موبائل ایپ تیار کی جائے گی جس میں تمام تفصیلات اور ٹریکنگ ممکن ہو گی۔

انیق احمد نے کہا کہ سعودی عرب میں حجاج کی نقل حرکت اور مالیاتی نظام  کیلئے کمپوٹرائزڈ نظام تشکیل دیں گے اور نجی حج گروپ  کے مینیجمنٹ انفارمیشن سسٹم کو مزید فعال بنایا جائے گا۔

دوسری جانب وزیر انفارمیشن ٹیکنالوجی عمر سیف نے یقین دلایا کہ حجاج کی بہتری کیلئے وزارتِ آئی ٹی اپنا  بھرپور تعاون مہیا کرے گی۔

انہوں نے کہا کہ نیشنل آئی ٹی بورڈ موجودہ حج انفارمیشن سسٹم کا تفصیلی تجزیہ کے بعد بہتری کی تجاویز دے گا۔ وزارتِ آٹی حج انفارمیشن سسٹم کو مربوط بنانے کیلئے ماہرین کی ٹیم مذہبی امور میں تعینات کرے گی۔

عمر سیف نے مزید کہا کہ نئے حج انفارمیشن سسٹم کی پیش رفت پر وزارتِ آئی ٹی میں ہفتہ وار اجلاس منعقد کیے جائیں گے۔

واضح رہے کہ اجلاس میں پنجاب آئی ٹی بورڈ، نیشنل آئی ٹی بورڈ اور وزارتِ مذہبی امور کے ایڈیشنل سیکرٹری، جوائنٹ سیکرٹری حج اور حج آئی ٹی سیل کے نمائندے شریک ہوئے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔