ایرانی شہریوں کو جعلی پاکستانی شناختی کارڈ اور پاسپورٹ جاری کرنے کا انکشاف ہوا ہے۔

تفصیلات کے مطابق نادرا کے متعدد افسر واہلکار جعلسازی میں ملوث پائے گے۔

حساس اداروں نے ایرانی شہریوں کے جعلی شناختی کارڈ جاری کرنے سے متعلق ایک خفیہ رپورٹ نادرا حکام کو جمع کروا دی۔

سینیٹ قائمہ کمیٹی میں بھی چیئرمین نادرا کی جانب سے ادارے میں جعل سازیوں کی تصدیق ہوئی ہے۔

معاملے میں ملوث متعدد نادرا ملازمین اور افسران کے خلاف کارروائی شروع کر دی گئی ہے، نادرا کے ایک درجن ملازمین پر ایرانی شہریوں کو جعلی شناختی کارڈز جاری کرنے کا الزام ہے۔

دوسرے ممالک کے شہریوں کو جعلی شناختی کارڈ جاری ہونے سے نادرا کے جدید سسٹم کے دعوے دھرے رہ گئے، کسی بھی ملک کے ڈیٹابیس میں غیر ملکی شہریوں کے اندراج کا معاملہ ملکی سیکیورٹی کے لئے سوالیہ نشان بن گیا ہے۔

ایرانی اور افغانی شہریوں کی بڑی تعداد جعلی شناختی کارڈز کی بدولت یورپ امریکہ کینیڈا سعودی عرب اور متحدہ عرب امارات میں مقیم ہے۔

انکوائری رپورٹ کے مطابق ایرانی شہریوں کو سینکڑوں جعلی کارڈ ناردا ملازمین کی مبینہ ملی بھگت سے نادرا بلوچستان کے مختلف سینٹرز میں پراسس ہوئے، 223 سے زائد ایرانیوں کے جعلی شناختی کارڈ پنجگور نادرا سینٹر سے جاری ہوئے، نادرا کارڈز کے بعد غیر ملکی شہریوں کی جانب سے مبینہ طور پر پاکستانی پاسپورٹ بھی حاصل کیے گئے۔

غیر قانونی طور پر پاکستان میں مقیم درجنوں افغان باشندے گرفتار

دوسری جانب گزشتہ دنوں کراچی پولیس نے الآصف سکوائر کے قریب کارروائی کرتے ہوئے غیرقانونی طور پر پاکستان میں مقیم درجنوں افغانیوں کو گرفتار کر لیا تھا۔

سندھ پولیس نے کراچی کے علاقے سہراب گوٹھ الآصف سکوائر کے قریب ٹارگٹڈ کارروائی کرتے ہوئے غیرقانونی طریقے سے بارڈر کراس کرکے آنے والے 26 افغان باشندے گرفتار کر لئے۔

پولیس کا کہنا تھا کہ کارروائی گشت پر مامور پیٹرولنگ افسر کی جانب سے کی گئی تھی کیونکہ کوئی بھی شخص پیٹرولنگ افسر کو اپنی پاکستانی شہریت نہیں دکھا سکا تھا۔

پولیس حراست کے دوران ملزمان نے بتایا کہ وہ غیر قانونی طریقے سے پاکستانی سرحد عبور کرکے ملک میں داخل ہوئے جبکہ گرفتار ملزمان کے خلاف فارن ایکٹ کی دفعات کے تحت مقدمہ درج کر لیا گیا۔

پولیس حکام کے مطابق سہراب گوٹھ میں پولیس کی بھاری نفری پہنچ چکی تھی جو غیر قانونی طور پر مقیم افغان شہریوں کے خلاف گرینڈ آپریشن کر رہی تھی جبکہ اس ٹیم کی سربراہی ڈی ایس پی سہراب گوٹھ چوہدری سہیل فیض کر رہے تھے۔

ڈی ایس پی سہراب گوٹھ کا کہنا تھا کہ مخصوص علاقے کو گھیرے میں لے لیا گیا تھا اور داخلی و خارجی راستے بند کر کے گھر گھر تلاشی کا عمل جاری ہے جبکہ اس آپریشن میں درجنوں پولیس اہلکار حصہ لے رہے ہیں۔

یاد رہے کہ قومی مفادات کے تحفظ کیلئے پاکستان واحد ملک نہیں جس نے غیر قانونی افغان شہریوں کو ملک بدر کرنے کا فیصلہ کیا، بہت سے ممالک جن میں بڑے ممالک بھی شامل ہیں  مفادات کے تحفظ اور ملکی ترقی کیلئے مختلف مواقعوں پر یہ فیصلے کرچکے ہیں ۔

انٹرنیشنل آگنائزیشن فار مائیگریشن (آئی او ایم) کی رپورٹ کے مطابق ایران نے 2021ء میں 10لاکھ 31 ہزار 757 افغان شہریوں کو ملک بدر کیا ۔

یورپی یونین ایجنسی آف اسائلم اورانٹرنیشنل فیڈریشن آف جرنلسٹس کی رپورٹ کے مطابق 1.7 ملین افغان شہری بغیر کسی ثبوت، بغیر کسی رجسٹریشن کے غیر قانونی طور پر پاکستان میں رہائش پذیر ہیں، یہ 1.7 ملین غیر قانونی تارکین وطن کا مخصوص گروہ ہے، جو پاکستان میں دہشت گردی اور مالی جرائم کے حوالے سے سب سے بڑا خطرہ ہے ۔

واضح رہے کہ غیر قانونی تارکین وطن کو دی گئی مہلت میں صرف 12 روز باقی رہ گئے ہیں، تاہم غیر قانونی طور پر مقیم غیرملکیوں کو 31 اکتوبر تک پاکستان چھوڑنا ہوگا، بصورت دیگر قانون نافذ کرنے والے ادارے گرفتاری اور ملک بدری کو یقینی بنائیں گے ۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں