جمیعت علمائے اسلام (ف) نے الیکشن کمیشن آف پاکستان سے انتخابی شیڈول میں ترمیم کا مطالبہ کردیا۔

تفصیلات کے مطابق جمیعت علمائے اسلام (ف) کی جانب سے الیکشن کمیشن سے کاغذات نامزدگی کی وصولی کے دن بڑھانے کا بھی مطالبہ کیا گیا ہے۔

اس حوالے سے جے یو آئی کے سینیٹر کامران مرتضیٰ نے چیف الیکشن کمشنر کو خط لکھا جس میں کہا گیا کہ سپریم کورٹ کے حکم پر الیکشن کمیشن کی جانب سے عام انتخابات کا شیڈول جاری کیا گیا، سیاسی جماعتوں نے انتخابات کیلئے قومی اور صوبائی سطح پر امیدواروں کو پارٹی ٹکٹ تقسیم کرنے ہیں۔

خط کے متن میں کہا گیا کہ الیکشن کمیشن نے شیڈول میں کاغذات نامزدگی جمع کرانے کیلئے 3 دن کا وقت رکھا ہے، کاغذات نامزدگی کی وصولی کیلئے تین دن کا اضافہ کیا جائے۔

کامران مرتضیٰ نے خط میں لکھا کہ کاغذات نامزدگی کی سکروٹنی کے وقت کو 7 دن سے کم کر کے چار دن کیا جاسکتا ہے، سکروٹنی کا وقت کم کرنے سے پولنگ 8 فروری کو کرانا ممکن ہوگا۔

خط کے مطابق جے یو آئی ف کو انتخابات کی تاریخ اور دیگر الیکشن شیڈول کے مراحل پر کوئی اعتراض نہیں، الیکشن ایکٹ کے سیکشن 58 کے تحت الیکشن کمیشن شیڈول کے اندر ردوبدل کرسکتا ہے۔

خط کے متن میں مزید کہا گیا کہ کاغذات نامزدگی کے وقت میں اضافہ جے یو آئی ف کیلئے بطور سیاسی جماعت باعث اطمینان ہوگا، کاغذات نامزدگی کا وقت بڑھانے سے سیاسی جماعتوں کو بہتر امیدواروں کے چناؤ میں آسانی ہوگی۔