کراچی میں عائشہ منزل پر فرنیچر مارکیٹ میں آتشزدگی کے باعث 3 افراد جھلس کر جاں بحق ہوگئے ہیں جبکہ 2 زخمی ہوگئے ہیں۔

تفصیلات کے مطابق میز نائن فلور پر بھی آگ کو بجھا دیا گیا ہے، پہلی اور دوسری منزلوں کے فلیٹس کی جانچ جاری ہے۔

ریسکیو 1122 کے مطابق ریسکیو اداروں نے300کے قریب افراد کو عمارت سے ریسکسو کیا۔

دکاندار کا کہنا ہے کہ ریسکیو اداروں کو آگ لگنے کی ابتدائی اطلاع شام 5 بجکر20منٹ پر دی۔

عینی شاہد کا کہنا ہے کہ آگ کی اطلاع کے 15 منٹ بعد فائر بریگیڈ عملہ2فائرٹینڈر کے ہمراہ پہنچا۔

ریسکیواہلکار کے مطابق پولیس کی مدد سے عمارت سے مکینوں کو ریسکیو کیا گیا، عمارت کی حالت خطرناک ہے کہیں منہدم نہ ہو جائے، آگ سے جھلس کر2افراد زخمی ہوئے، سول اسپتال برنس وارڈ منتقل کردیے گئے ہیں۔

ایم ایس سول اسپتال ڈاکٹر خالد بخاری کا کہنا ہے کہ ایک زخمی 100فیصد جھلسا ہوا ہے، زخمی کی شناخت23سالہ مصطفیٰ کے نام سے ہوئی، زخمی شخص کی حالت انتہائی تشویشناک ہے جبکہ دوسرے زخمی کی شناخت 60 سالہ ساجد کے نام سے ہوئی ہے۔

عینی شاہد کا کہنا ہے کہ آگ لگنے سے پہلے شارٹ سرکٹ ہوا، سلنڈرمیں مرمت کے دوران آگ لگ گئی، مرمت کرنے والے نے سلنڈر باہر پھینکا تو دھماکا ہوا، جس کے بعدا ٓگ نے دکان کو لپیٹ میں لے لیا۔

نگراں وزیراعلیٰ سندھ مقبول باقر،گورنر سندھ کامران ٹیسوری اور میئر کراچی مرتضیٰ وہاب نے واقعے کا نوٹس لے لیا ہے۔

یاد رہے کہ کراچی کے علاقے عائشہ منزل کے قریب ایک فوم ( بیڈ میٹریس ) فروخت کرنے والی دکان میں لگی،آس پاس کی دکانیں بھی اسی کاروبار کی ہیں، جس کی وجہ سے آگ کی شدت میں اضافہ ہوا۔

 فائر بریگیڈ حکام کا کہنا ہے کہ دکانوں سے شروع ہونے والی آگ نے رہائشی عمارت کو لپیٹ میں لے لیا ہے، فائر بریگیڈ کی مزید گاڑیاں طلب کرلی گئی ہیں۔

پولیس کا کہنا ہے کہ فوم کی ایک دکان میں اچانک آگ لگی جو مزید پھیل گئی، تمام دکانوں میں فوم اور میٹرس موجود ہیں۔

ذرائع کا کہنا ہے کہ پولیس، ریسکیو اداروں کی جانب سے رہائشی عمارت سے لوگوں کو نکالنے کی کوششیں جاری ہیں۔

فائر بریگیڈ حکام کا دعویٰ ہے کہ 8 فائر ٹینڈرز، ایک اسنارککل اور ایک باؤزر موقع پر موجود ہیں۔

گورنر سندھ کامران ٹیسوری نے آگ لگنے کے واقعے کا نوٹس لیتے ہوئے عمارت سے لوگوں کے حفاظتی انخلا کو یقینی بنانے کی ہدایت کی ہے۔

گورنر سندھ نے کمشنر کراچی کو ہدایت کی ہے کہ آگ پر قابو پانے کے لیے ہر ممکن وسائل بروئے کار لائے جائیں۔

پاک بحریہ کے فائر ٹینڈر اور عملہ آگ بجھانے میں مصروف

پاک بحریہ کے فائر فائٹرز کی جانب سے عائشہ منزل پر فوم مارکیٹ میں لگی آگ پر قابو پانے میں بھرپور معاونت جاری ہے۔

ترجمان پاک بحریہ کے مطابق پاک بحریہ کے فائر ٹینڈر اور عملہ آگ بجھانے میں مصروف ہیں، پاک بحریہ آگ پر قابو پانے میں ہر ممکن مدد فراہم کرے گی، آگ کی شدت کے پیش نظر پاک بحریہ کے مزید فائر ٹینڈرز کو روانہ کر دیا گیا ہے۔

 ترجمان پاک بحریہ کے مطابق پاک بحریہ کے 7 فائر ٹینڈرز اور تجربہ کار عملہ آگ پر قابو پانے کیلئے کوشاں ہیں، پاک بحریہ کے جوان سول انتظامیہ کی درخواست پر آگ بجھانے کے عمل میں مصروف ہیں۔