معروف اداکارہ فریال محمود کا کہنا ہے کہ فلم وکھری مظلوم عورتوں کی آواز ثابت ہوگی۔

 تفصیلات کے مطابق ڈراموں اور فلموں کی معروف اداکارہ فریال محمود نے میڈیا سے گفتگو کرتے ہوئے کہا کہ فلم وکھری کے مرکزی کردار کے لیے تین ماہ تک قندیل بلوچ کے انٹرویوز دیکھتی رہی، معاشرے نے ان کے ساتھ ناانصافی کی لیکن میں نے کردار کے ساتھ انصاف کرنے کے لیے پوری کوشش کی۔

فریال محمود نے کہا کہ فلم وکھری، کو کامیاب بنانے میں اپنا کردار ادا کریں گی۔

انہوں نے کہا کہ پاکستان کی آبادی کا نصف سے زیادہ حصہ خواتین کا ہے، 5 جنوری کو وکھری ریلیز ہوکر خواتین کی آواز بن کر سامنے آئے گی۔

فریال محمود نے کہا کہ مجھے بچپن سے اداکاری کا جنون رہا ہے،آئینے کے سامنے کھڑی ہو کر فنکاروں کی نقل اتارتی تھی۔

فریال محمود نے بتایا کہ میری والدہ اداکارہ فریال گوہر کو پسند کرتی تھیں، اسی لیے میرا نام فریال رکھا، مجھے رقص میں مہارت حاصل ہے لیکن فلموں کی آئٹم گرل نہیں کہلانا چاہتی ہوں، خوش بخت ہوں کہ ایک ماہ کے عرصے میں میری تین فلمیں ریلیز ہورہی ہیں۔

یاد رہے کہ فلم وکھری کی ڈائریکٹر ارم پروین بلال نے آڈیشن کے بعد فریال محمود کو مرکزی کردار کے لیے منتخب کیا، فلم وکھری مکمل انٹرٹیمنٹ پیسا وصول فلم ہے۔

واضح رہے کہ فلم وکھری کو سعودی عرب کے شہر جدہ میں ریڈ سی انٹرنیشنل فلم فیسٹیول کے تھرڈ ایڈیشن میں دیکھایا جاچکا ہے۔