چیف الیکشن کمشنر سکندر سلطان راجہ نے کہا ہے کہ انتخابات صاف اورشفاف ہوں گے۔

عام انتخابات سے متعلق چیف الیکشن کمشنر نے اپنے جاری کردہ بیان میں کہا ہے کہ انتخابات قومی فریِضہ ہے، سب کو حصہ ڈالنا چاہیے، ووٹرز مرضی کے امیدوار کو آزادی سے ووٹ ڈالیں۔

انہوں نے کہا کہ امن وامان کے پیش نظر انٹرنیٹ سروس بند کرنے کا فیصلہ کیا گیا، سیکیورٹی کا جائزہ لینا اداروں کی ذمہ داری ہے، بلوچستان میں دہشت گردی کے 2 واقعات میں لوگ شہید ہوئے۔

سکندر سلطان راجہ نے مزید کہا کہ وزارت داخلہ کو انٹرنیٹ سروسز سے متعلق ہدایات نہیں دیں گے، سروس کھولنے کا کہیں اور دہشت گردی ہوجائے تو ذمہ دار کون ہوگا؟ ہمار اسسٹم انٹرنیٹ پر منحصر نہیں، فرق نہیں پڑے گا۔

واضح رہے کہ پاکستان بھر میں عام انتخابات 2024 کے لیے پولنگ کے عمل کا آغاز ہوگیا ہے، تاہم پولنگ کا عمل بغیر کسی وقفے کے صبح 8 بجے سے شام 5 بجے تک جاری رہے گا۔

قومی اور چاروں صوبائی اسمبلیوں کے 855 حلقوں کیلئے 12 کروڑ 79 لاکھ سے زیادہ رجسٹرڈ ووٹرز اپنا حق رائے دہی استعمال کریں گے جبکہ ان انتخابات میں ملک کی انتخابی تاریخ میں سب سے زیادہ امیدوار حصہ لے رہے ہیں جن کی تعداد 17 ہزار  سے زائد ہے جن میں 11 ہزار سے زائد آزاد امیدوار ہیں۔

ملک بھر میں 90 ہزار 675 میں سے 46 ہزار 65 پولنگ اسٹیشنز کو حساس و انتہائی حساس قرار دیا گیا ہے جبکہ شفاف پولنگ کے لیے مختلف شہروں میں مانیٹرنگ سیلز قائم کیے گئے ہیں۔