مظفرآباد: آزاد کشمیر الیکشن کمیشن نے نامزد وزیراعلیٰ خیبرپختونخوا علی امین گنڈاپور کے وارنٹ گرفتاری جاری کر دیے۔

علی امین گنڈاپور کے خلاف آزاد کشمیر کے عام انتخابات میں ضابطہ اخلاق کی خلاف ورزی کا کیس زیر سماعت ہے، تاہم اس حوالے سے ڈپٹی کمشنر ڈیرہ اسماعیل خان کو نامزد وزیراعلیٰ خیبر پختونخوا علی امین کی گرفتاری کا مراسلہ جاری کر دیا گیا ہے۔

مراسلے میں علی امین گنڈاپور کو 28 فروری کو گرفتار کر کے الیکشن کمیشن آزاد کشمیر کے روبرو پیش کرنے کی ہدایت کی گئی ہے۔

توہین کی درخواست نواجوان وکیل راجہ ذوالقرنین عابد کی جانب سے 2021 کے الیکشن کے دوران دائر کی گئی تھی، تاہم آزادکشمیر میں عام انتخابات کے دوران علی امین گنڈا پور وفاقی حکومت میں وزیر امور کشمیر تھے۔

علی امین گنڈا پور آزادکشمیر کے عام انتخابات 2021 میں تحریک انصاف کی انتخابی مہم چلاتے رہے، تاہم مہم کے دوران علی امین گنڈا پور کی پیسے دیتے ہوئے ایک ویڈیو بھی سامنے آئی تھی۔

الیکشن کمیشن آزاد کشمیر نے علی امین گنڈا پور کی انتخابی مہم میں شرکت پر پابندی عائد کر دی تھی جبکہ ان پر انتخابی مہم کے دوران وادی جہلم میں پتھراؤ ہوا اور انکے گارڈز کی جانب سے ہوائی فائرنگ کا واقعہ بھی پیش آیا تھا۔

الیکشن کمیشن نے کہا ہے کہ اگر علی امین گنڈا پور 50 ہزار روپے ضمانت مچلکہ جمع کروائیں تو حراست سے باہر کیا جائے۔

واضح رہے کہا کہ چند روز قبل پاکستان تحریک انصاف نے سابق صوبائی وزیر علی امین گنڈا پور کو وزیراعلیٰ خیبرپختونخوا نامزد کردیا تھا، تاہم بانی پی ٹی آئی کی جانب سے علی امین گنڈا پور کو وزیراعلیٰ خیبرپختونخوا کے لیے نامزد کیے جانے کی تصدیق بھی کردی گئی تھی۔

بعدازان علی امین گنڈاپور کی بطور وزیراعلیٰ نامزدگی پر پی ٹی آئی میں اختلافات سامنے آئے تھے، علی امین گنڈاپور کی نامزدگی پر اسد قیصر، مشتاق غنی، عاطف خان اور شہرام ترکئی ناخوش ہیں۔