سندھ کے نگران وزیر داخلہ بریگیڈیئر ریٹائرڈ حارث نواز نے کہا ہے کہ حالات مکمل قابو میں ہیں، امید ہے انتخابات اچھے ماحول میں پرامن ہوں گے۔

حارث نواز نے بول نیوز سے گفتگو کرتے ہوئے کہا کہ امیدواروں سے اپیل ہے کہ قانون کو ہاتھ میں نہ لیں، ووٹرز پولنگ اسٹیشنز میں جا کر اپنا حق استعمال کریں۔

انہوں نے کہا کہ سیکیورٹی کیلئے پولیس ہر پولنگ اسٹیشن پر موجود ہوگی، الیکشن کے دوران نارمل پولنگ اسٹیشن پر 4، حساس میں 5 اور انتہائی حساس میں 6 اہلکار ہوں گے۔

نگران وزیر داخلہ سندھ نے مزید کہا کہ پولنگ کے بعد امید ہے کہ رات 2 بجے تک الیکشن کے نتائج آجائیں گے۔

واضھح رہے کہ الیکشن 2024 کی تیاری آخری مراحل میں داخل ہوگئی ہے، کراچی میں کئی حلقوں پر کانٹے دار مقابلے دیکھے جانے کا امکان ہے۔

عام انتخابات میں کراچی کے 90 لاکھ سے زائد ووٹرز حق رائے دہی استعمال کریں گے، تاہم این اے کی 22 اور پی ایس کی 47 نشستوں پر ووٹنگ ہوگی۔

قومی وصوبائی نشستوں کے لئے 1995 امیدوار میدان ہیں، ووٹرز کے لحاظ سے کراچی کا سب سے چھوٹا حلقہ این اے 244 ہے، اس میں ایک لاکھ 55 ہزار 824 ووٹرز رجسٹرڈ ہیں جبکہ اس کی کل آبادی 9 لاکھ 44 ہزار 27 ہے۔

ووٹرز کے لحاظ سے کراچی کا این اے 248 سب سے بڑا حلقہ قرار دیا گیا ہے، اس حلقے میں 5 لاکھ 93 ہزار 673 ووٹرز رجسٹرڈ ہیں جبکہ اس کی کل آبادی 9 لاکھ 78 ہزار 169 ہے۔

اس کے علاوہ پولنگ اسٹیشنز پر سیکیورٹی کے انتہائی سخت انتظامات کیے گئے ہیں،پولنگ اسٹیشنز کے باہر پولیس رینجرز اور آرمی کے جوان تعینات کیے گئے ہیں۔

سندھ بھر میں 2 کروڑ سے زائد ووٹرز حق رائے دہی کا استعمال کریں گے، تاہم 19008 پولنگ اسٹیشن سندھ میں قائم کیے گئے ہیں جبکہ حساس پولنگ اسٹیشن پر کیمرے بھی نصب کیے گئے ہیں۔

ووٹ ڈالنے کے لیے اصل شناختی کارڈ کا ساتھ ہونا لازم قرار دیا گیا ہے جبکہ شناختی کارڈ کی کاپی ووٹ ڈالنے کے لیے قابل قبول نہیں۔

الیکشن کمیشن نے بتایا ہے کہ زائد المیعاد شناختی کارڈ پر ووٹ ڈالا جاسکتا ہے جبکہ شناختی کارڈ کےعلاوہ پاسپورٹ، ب فارم یا ڈرائیونگ لائسنس قابل قبول نہیں۔