اسلام آباد ہائی کورٹ کے ججز کی جانب سے لکھے گئے خط کے معاملے پر وزیر اعظم شہباز شریف کی چیف جسٹس آف پاکستان قاضی فائز عیسیٰ سے سپریم کورٹ میں ملاقات ہوئی۔

وزیر اعظم محمد شہباز شریف چیف جسٹس آف پاکستان قاضی فائز عیسیٰ سے ملاقات کے لیے سپریم کورٹ پہنچے جہاں رجسٹرار سپریم کورٹ اور پروٹوکول عملے نے وزیر اعظم کا استقبال کیا۔

ملاقات کے دوران وزیر اعظم  شہباز شریف اور چیف جسٹس آف پاکستان قاضی فائز عیسیٰ کے درمیان اسلام آباد ہائی کورٹ کے 6 ججوں کی جانب سے سپریم جوڈیشل کونسل کو خفیہ ادارے کے اہلکاروں کی مبینہ مداخلت سے متعلق لکھے گئے خط کے حوالے سے پیدا شدہ صورتحال پر تفصیلی گفتگو ہوئی۔

ملاقات میں وفاقی وزیر قانون و انصاف اعظم نذیر تارڑ، اٹارنی جنرل منصور عثمان اعوان اور سپریم کورٹ کے سینیئر جج منصور علی شاہ بھی شریک تھے۔

وزیر اعظم شہباز شریف کی چیف جسٹس پاکستان قاضی فائز عیسیٰ سے ملاقات 1 گھنٹے سے زائد جاری رہی، جس کے بعد وزیر اعظم سپریم کورٹ سے روانہ ہو گئے۔

واضح رہے کہ 26 مارچ کو اسلام آباد ہائی کورٹ کے 6 ججز نے ججوں کے کام میں خفیہ اداروں کی مبینہ مداخلت اور دباؤ میں لانے سے متعلق سپریم جوڈیشل کونسل کو خط لکھا تھا۔

بعدازاں اسلام آباد ہائی کورٹ کے 6 ججز کے خط کے معاملے پر گزشتہ روز چیف جسٹس آف پاکستان قاضی فائز عیسیٰ کی زیر صدارت سپریم کورٹ کا فل کورٹ اجلاس ہوا تھا جس میں اسلام آباد ہائیکورٹ کے ججز کے خط پر غور کیا گیا تھا اور ججز کے خط کی آئینی و قانونی حیثیت کا جائزہ لیا گیا تھا۔