پاکستان تحریک انصاف کے رہنما اسد قیصر نے حکومت کو بڑا سرپرائز دے دیا ہے۔

پاکستان تحریک انصاف کے رہنما اسد قیصر نے اپنے ایک بیان میں کہا ہے کہ وفاقی حکومت نے علی امین گنڈاپور کا کوئی مطالبہ نہیں ماننا، وفاق نے ابھی تک ایک افسر بھی وزیر اعلیٰ کے کہنے پر نہیں لگایا جبکہ تاحال خیبر پختونخوا کے بقایاجات پر کوئی پیشرفت نہیں ہوئی۔

 انہوں نے کہا کہ ججز پر دباؤ ڈالا گیا اور ڈرایا دھمکایا گیا، سپریم کورٹ کی ذمہ داری ہے ججز کو مکمل تحفظ فراہم کریں۔

اسد قیصر نے کہا کہ معزز ججز کی توہین میں وزیر اعظم شہباز شریف کا مکمل ہاتھ ہے، 2 سال میں پی ٹی آئی اور ججز کو شہباز دور حکومت میں ہراساں کیا گیا، ججز کے ساتھ یہ واقعات پورے پاکستان میں پیش آئے، 6 ججز نے جو بہادری دکھائی ہے یہ قوم کے ہیرو ہیں۔

پی ٹی آئی کے رہنما نے کہا کہ چیف جسٹس جوڈیشل کمیشن بنائیں اور ججز کو مکمل انصاف فراہم کریں، جن کی سربراہی میں ججوں کو دھمکیاں دی گئیں اور فائدہ پہنچا ان ہی کو کمیشن بنانے کا کہا گیا ہے، اس سے عدلیہ کی عزت داؤ پر لگی ہے، یہ مفاہمت نہیں بلکہ مزاحمت کا وقت ہے، ہمیں قانون کی بالادستی کیلئے ابھی باہر نکلنا ہوگا۔

سابق اسپیکر قومی اسمبلی نے کہا کہ بہت بڑی تحریک جلد شروع کرنے جا رہے ہیں، اپنے حقوق کی جنگ آخر تک لڑیں گے، وکلاء، سول سوسائٹی، میڈیا برادری، طلبہ اور کسان تحریک میں شرکت کریں۔