عدت میں نکاح کیس میں جج شاہ رخ ارجمند نے بشریٰ بی بی کے سابق شوہر خاور مانیکا پر برہمی کا اظہار کیا۔

اسلام آباد کی ڈسٹرکٹ اینڈ سیشن کورٹ میں عدت میں نکاح کیس میں سزا کے خلاف بانی پی ٹی آئی اور بشریٰ بی بی کی اپیلوں پر سماعت سیشن جج شاہ رخ ارجمند نے کی۔

خاور مانیکا نے سزا کے خلاف اپیلیں سننے والے سیشن جج شاہ رخ ارجمند پر عدم اعتماد کا اظہار کرتے ہوئے کہاکہ میرے خاندان کو تباہ کر دیا گیا، مجھے نہیں لگتا کہ مجھے انصاف ملے گا، آپ یہ کیس ٹرانسفر کر دیں۔

جج شاہ رخ ارجمند نے ان سے سوال کیا کہ آپ نے یہ کیسے سوچ لیا؟ کل مجھے بھی قبر میں جانا ہے، آپ کو بھی۔

بانی پی ٹی آئی کے وکیل سلمان اکرم راجہ نے دوران سماعت جج شاہ رخ ارجمند سے مکالمہ کرتے ہوئے کہا کہ یہ شرمناک ہے، آپ پر پریشر ڈالنے کی کوشش ہے، آپ ان کی بات نوٹ کر لیں، ان کا جھوٹ بڑھتا جا رہا ہے۔

وکیل سلمان اکرم راجہ نے بشریٰ بی بی کے سابق شوہر خاور مانیکا سے متعلق کہا کہ یہ بندہ جھوٹا ہے، انتہا کا جھوٹا ہے،عدم اعتماد کی ان کی درخواست پر جرمانہ کیا جائے۔

دورانِ سماعت خاور مانیکا اور بانی پی ٹی آئی کے وکیل سلمان اکرم راجہ کے درمیان تلخ جملوں کا تبادلہ بھی ہوا۔

بعدازاں عدالت نے بشریٰ بی بی کے سابق شوہر خاور مانیکا کی عدم اعتماد کی درخواست پر فیصلہ محفوظ کر لیا۔