عید الاضحیٰ کے موقع پر وزیراعظم محمد شہبازشریف اور ملائیشیا کے وزیراعظم عزت مآب داتوک سیری انور ابراہیم کے درمیان ٹیلیفونک رابطہ ہوا جس میں دونوں رہنماؤں نے عید الاضحیٰ کی مبارکباد دی۔

 ٹیلیفونک رابطہ کے دوران وزیراعظم نے ملائیشیا کے برادرانہ عوام اور امت مسلمہ کی خوشحالی اور ترقی کے لیے نیک تمناؤں اور دعاؤں کا اظہار کیا،جبکہ غزہ میں جاری بحران پر گفتگو کرتے ہوئے وزیراعظم نے ملائیشین وزیراعظم انور ابراہیم کی قیادت میں فلسطینی کاز پر ملائیشیا کے اصولی اور مستقل موقف کو سراہا۔

دونوں رہنماؤں نے غزہ میں مستقل جنگ بندی کے لیے کوششوں کو دوگنا کرنے اور معصوم فلسطینی بھائیوں کو ضروری امداد کی فراہمی کو یقینی بنانے پر اتفاق کیا۔

پاکستان اور ملائیشیا کے درمیان قریبی اور خوشگوار تعلقات کا ذکر کرتے ہوئے وزیراعظم نے دوطرفہ تعلقات کی رفتار پر اطمینان کا اظہار کیا اس کے علاوہ دونوں فریقوں نے اپنے تعلقات کو مزید مضبوط بنانے پر اتفاق کیا، جو کہ باہمی دلچسپی کے تمام امور پر یکساں خیالات کے حامل ہیں۔

دونوں رہنماؤں نے اپریل 2024 میں ریاض میں عالمی اقتصادی فورم کے خصوصی اجلاس کے موقع پر اپنی حالیہ نتیجہ خیز ملاقات کے ساتھ ساتھ گزشتہ چار مہینوں میں دو ٹیلی فونک روابط کو یاد کرتے ہوئے اعلیٰ سطح کے باقاعدہ تبادلوں کو برقرار رکھنے کی ضرورت پر زور دیا اس کے علاوہ وزیراعظم نے دورہء پاکستان کی دعوت کو قبول کرنے پر وزیراعظم انور ابراہیم کا شکریہ ادا کیا۔

  ٹیلیفونک رابطہ کے دوران دونوں رہنماؤں نے پاکستان اور ملائیشیا کے درمیان باہمی دلچسپی کے تمام شعبوں بالخصوص تجارت اور سرمایہ کاری میں تاریخی تعلقات کو مزید وسعت دینے کے عزم کا اعادہ کیا۔