وزیراعلیٰ سندھ سید مراد علی شاہ نے کہا کہ سندھ حکومت کراچی کے مسائل پر بھرپور توجہ دے رہی ہے۔

وزیراعلیٰ سندھ نے کہا کہ عوام کو سہولت  فراہم کرنے کی ہرممکن کوشش کررہے ہیں، بارشوں کے  بعد ہی شہر کی سڑکوں کی مرمت کا کام شروع کیا گیا، جبکہ حکومت سندھ 1.5 بلین روپے کے ایم سی کو روڈز کی مرمت کے لیے جاری  کرچکی ہے۔

  وزیراعلیٰ سندھ نے کہا کہ کراچی کے مختلف منصوبوں پر 200 ارب روپے  خرچ کر رہے ہیں، ٹرانسپورٹ کے اہم پروجیکٹس پر کام تیزی سے جاری ہے، جبکہ ریڈ لائن اور یلو لائن بی آر ٹی پروجیکٹس  مکمل ہونے سے شہر میں  ٹرانسپورٹ کے مسائل میں کافی  حد تک بہتری آئے  گی۔

مراد علی شاہ نے کہا کہ ہم  نے وفاقی حکومت  کے توسط سے ایک بار پھر کراچی سرکلر ریلوے  کی بحالی کے لیے چائینیز حکام سے بات  چیت شروع کردی ہے، انشااللہ پاکستان پیپلزپارٹی بہت جلد کراچی سرکلر کا پروجیکٹ اپنے شہریوں  کو دے گی، جبکہ ملیر ایکسپریس کے مکمل ہونے سے شہرمیں  ٹریفک کی روانی میں بہتری آئے گی  اور کنجیکشن کا  مسئلہ  بھی حل ہوجائے گا۔

  وزیراعلیٰ سندھ نے کہا کہ  سندھ حکومت کراچی پورٹ سے جام صادق برج تک ایک اور ایکسپریس وے کا منصوبہ بنانے جا رہے ہیں ہے، جب ٹرانسپورٹ، روڈ سیکٹر، سیف سٹی اور کے فور جیسے پروجیکٹس مکمل ہوں گے تو کراچی ایک عظیم شہر بن جائے گا۔

  مراد عل شاہ نے کہا کہ پیپلزپارٹی کا نصب العین عوام کی خدمت اور صرف خدمت ہی ہے، پیپلزپارٹی کی سندھ حکومت نے ایسے پروجیکٹس مکمل کیے ہیں جس سے صوبے کے ساتھ ساتھ پورے ملک کو فائدہ ہوا ہے، اس کے علاوہ تھر کول مائننگ کول اور ونڈ پاور منصوبے،  دریا پر پلوں کی تعمیر قومی منصوبے ہیں جوکہ سندھ حکومت نے  پورے کیے۔