ایم کیو ایم پاکستان کے رہنما سید مصطفیٰ کمال نے کہا کہ یہ ملک ہے تو ہماری سیاست ہے، جمہوریت ہے۔

ایم کیو ایم پاکستان کے رہنما مصطفیٰ کمال نے میڈیا سے گفتگو کرتے ہوئے کہا کہ پاکستان کا معاشی مسئلہ کسی سے چھپی ہوئی بات نہیں ہے، پاکستانی معاشی صورتحال، حالات سب کے سامنے ہیں، تمام ریاستی ادارے ملک کے استحکام کے لیے کوششیں کررہے ہیں، اس کے اثرات سامنے آرہے ہیں، ڈالراپنی جگہ رک گیا ہے، اسٹاک ایکسچینج اپنی جگہ ہے۔

انہوں نے یہ بھی کہا کہ ہم مہنگائی میں سنگل ڈیجٹ پر آگئے ہیں، دوسرے ممالک سے انویسٹمنٹ کے لیے وفود آرہے ہیں، اس کا فائدہ پاکستان کا ہوگا۔

مصطفیٰ کمال نے کہا کہ شنگھائی کانفرنس سمٹ ہورہا ہے جس میں کئی سربراہان مملکت اور ان کے وفود پاکستان آئیں گے، پاکستان اس دن دنیا کی نظروں میں ہوگا، پاکستان پر لوگوں کا ٹرسٹ مضبوط ہوگا۔

ان کا یہ بھی کہنا تھا کہ پی ٹی آئی 15 اکتوبر کو ڈی چوک میں احتجاج کرے گی، اسلام آباد کا ریڈ زون ایریا فوج کے حوالے کردیا گیا ہے، ہمارے دشمن ملک میں استحکام نہیں آنے دینا چاہتا ہے، جب 15 اکتوبر کو سربراہان مملکت پاکستان میں لینڈ کررہے ہوں گے۔

انہوں نے کہا کہ ہماری سیاست ہماری اپنی ذات ملک کی سالمیت سے اوپر نہیں ہے یہ ملک اور ادارے ہیں تو ہم چین سے سانس لے رہے ہیں، اگر فوج کو ختم کردیا جائے تو وہ شام، لیبیا بن جاتے ہیں۔

مصطفیٰ کمال نے میڈیا سے گفتگو کرتے ہوئے یہ بھی کہا کہ ہمارے یہاں پر بھی نعرہ لگتا تھا ہمیں منزل نہیں رہنما چاہیے ارے کیا پاگل ہیں منزل نہیں رہنما چاہیے ارے بھائی ہمیں منزل چاہئے رہنما کو لیکر چاٹنا تھوڑی ہے ہم نے،  ہم نے رہنما ہی فارغ کر دیا اب ہمیں منزل چاہئے، ہم نہیں ہمارے بعد والا چکر ٹھیک نہیں ہے، خان نہیں تو پاکستان نہیں ایسے بیچاروں کا کوئی قصور نہیں، ہم نے بھائی کو خوش کرنے کے لیے یہ کام کیے تھے لیکن بھائی خوش نہیں ہوتا تھا کبھی۔

انہوں نے یہ بھی کہا کہ میں یہ بات مان نہیں سکتا اسرائیل ہمارے بارے میں ایکشن نہیں کر رہا ہوگا، وہ ہمیں معاشی طور پر کمزور کرے گا، اسرائیل کے اخبارات میں آپ کے حق میں آرٹیکل لگتے ہیں۔

ان کا کہنا تھا کہ پی ٹی آئی کے کارکنان کی مظلومیت ہم سمجھ سکتے ہیں کیوں کے ہم بھی یہ سب کر چکے ہیں، قائد کو خوش کرنے کے لیے یہ سب کر رہے ہیں، پی ٹی آئی کو اسلام آباد میں اس وقت احتجاج نہیں کرنا چاہئے، سیاست کو سیاست کے طرح کریں، ریاست سے کھیلنے میں آپ اکیلے رہ جائیں گے، پی ٹی آئی ایسے کام نہ کرے جس سے پاکستان کی جمہوریت کو خطرہ ہو۔