کراچی: گورنر سندھ کامران ٹیسوری نے ڈمپر مافیا کو خبردار کرتے ہوئے کہا کہ ایسا سدباب ہوگا کہ ڈمپرمافیا یاد کرے گا۔

گورنر سندھ کامران ٹیسوری نے بول نیوز سے گفتگو کرتے ہوئے کہا کہ ڈمپر والے سدھر جائیں یا جیل جانے کے لیے تیار ہوجائیں، ڈمپر مالکان اپنے ڈرائیورز کو قانون کی پاسداری سکھائیں۔

گورنر سندھ کا کہنا ہے کہ ماں باپ کے واحد سہارے بھی ڈمپرز تلے آکر کچلے جارہے ہیں، یہ نہیں ہوسکتا کہ ڈمپرز والے کراچی والوں کو کچلتے رہیں۔

انہوں نے خبردار کرتے ہوئے کہا کہایسا اب نہیں چلےگا، یہ نہ ہو ایکشن لیا جائے تو یہ ہڑتالوں پر چلے جائیں۔ ہمارا کام ہے کہ انسانوں کی جانوں کا تحفظ کریں، یہ کیسی خدمت ہے ہم انسانوں کی جانوں کو نہیں بچا سکتے۔

کامران ٹیسوری کہتے ہیں کہ اپنی ماں کا واحد سہارا ڈمپر کے نیچے آکر کچلا گیا، ایسے ہی حادثے کا شکار 2 سالہ بچی بھی ہوئی۔ موت لے کر سڑکوں پر گھومنے والے ڈمپرز کے قوانین وضع ہونے چاہیے۔

ان کا کہنا تھا کہ ڈمپرز کو ہر گز یہ اجازت نہیں کہ موت لے کر سڑکوں پر گھومتے رہیں ورنہ ایسا سدباب ہوگا کہ ڈمپرمافیا یاد کرے گا۔ کل بھی کہا تھا، آج بھی کہہ رہا ہوں کہ ایسا اب نہیں چلے گا۔

انہوں نے مخاطب کرتے ہوئے کہا کہ ڈمپرز مالکان کو ہدایت دے رہا ہوں ڈرائیورز کو قانون کی پاسداری سکھائیں ورنہ خلاف ورزی پر تیار رہیں ایسی سزا کے لئے جو ماں کے دل کی آہ ہو۔

گورنر سندھ نے یہ بھی کہا کہ ڈمپرز ڈرائیورز کو یا تو کھلےعام سڑکوں پر کھڑا کرکے کوڑوں کی سزا دی جائے لیکن ہم اس حد تک نہیں جانا چاہتے، قانون کی پاسداری چاہتے ہیں جب کہ آئی جی سندھ اور ڈی آئی جی ٹریفک سے بھی بات کر رہا ہوں۔

کامران ٹیسوری نے بتایا کہ سندھ حکومت کو خط لکھ کر کہوں گا قوانین پر عمل کرائیں، ایسا نہیں ہے کہ باتیں ہی کریں، ایکشن ہوتا نظر آنا چاہیے اور ذمہ داروں کو قرار واقعی سزا دلوائی جائے گی۔

انہوں نے مزید کہا کہ دو سے تین دن میں عمل درآمد نہیں ہوتا تو گورنرسندھ ڈمپرز کے آگے کھڑا نظر آئے گا۔ چاہے مجھے عدالت جانا پڑے، رات کو سڑکوں پر بھی نظر آؤں گا جب کہ ڈمپرز کے خلاف عوام کا ردعمل بھی نظر آئے گا۔