اسلام آباد: سینیٹر طلال چوہدری کا کہنا ہے کہ کرپشن کو اسلامی ٹچ دینا بانی پی ٹی آئی کا طریقہ واردات ہے۔

وفاقی وزیر اطلاعات عطااللہ تارڑ اور سینیٹر طلال چوہدری نے مشترکہ نیوز کانفرنس کی جس دوران طلال چوہدری کا کہنا تھا کہ کرپشن کواسلامی ٹچ دینا بانی پی ٹی آئی کا طریقہ واردات ہے۔

طلال چوہدری نے کہا کہ بانی پی ٹی آئی اور ان کی اہلیہ توشہ خانہ لوٹ کر کھا گئے، پی ٹی آئی والے مقدمات کا سامنا کرنے کے بجائے ڈیل کا تاثر دیتے ہیں جب کہ نوازشریف نے سیاسی انتقام کا بہادری سے مقابلہ کیا۔

طلال چوہدری کہتے ہیں کہ این سی اے نے 190 ملین پاؤنڈ قومی خزانے میں جمع کرانے کے لیے واپس کیے، 190 ملین پاؤنڈ کیس میں این آر او کا سوال ہی پیدا نہیں ہوتا۔

دوسری جانب وفاقی وزیر اطلاعات عطااللہ تارڑ کا کہنا تھا کہ 190 ملین پاؤنڈ کا آج فیصلہ سنایا جانا تھا لیکن آج ملزمان عدالت میں پیش نہیں ہوئے۔

انہوں نے الزام عائد کرتے ہوئے کہا کہ عدالتی کیسز میں تاخیری حربے استعمال کرنا ملزمان کا وطیرہ رہا ہے جب کہ ان عناصر نے مقدمات کو طول دینے کے لیے تمام حربے استعمال کیے۔

عطااللہ تارڑ کا کہنا ہے کہ پی ٹی آئی دور کی کابینہ نے 190 ملین پاؤنڈ ڈاکے کی توثیق کی اور بند لفافے میں حقائق بتائے بغیر ہی فیصلہ کردیا گیا۔ توشہ خانہ کیس میں بھی انہوں نے تاخیر کی اور ہائیکورٹ سے اسٹے لیا۔

وفاقی وزیر مزید کہتے ہیں کہ 190 ملین پاؤنڈ پر کہا جاتا ہے ہم نے تو ٹرسٹ بنایا تھا جب کہ بانی پی ٹی آئی نے تاخیری حربوں میں پی ایچ ڈی کی ہوئی ہے۔ بانی پی ٹی آئی نے ہر کیس کو تاخیر کا شکار کیا۔