اسلام آؓباد: وفاقی کابینہ کا اجلاس کل صبح 11 بجے طلب کیا گیا ہے جس میں 13 نکاتی ایجنڈے پر غور ہوگا۔

وزیراعظم شہباز شریف کی زیر صدارت وفاقی کابینہ کا اجلاس کل صبح 11 بجے ہوگا جس میں وفاقی کابینہ 13 نکاتی ایجنڈے پر غور کرے گی۔

کابینہ پی ٹی آئی دور حکومت میں پی آئی اے ہوا بازوں سے متعلق بیان کی تحقیقاتی رپورٹ پر غور اور مڈل ایسٹ گرین اینشی ایٹو چارٹر کی منظوری دے گی جب کہ کابینہ وزارت تجارت کی سفارش پر ٹیرف ریٹ کوٹا کی تقسیم کی سمری پر بھی غور کرے گی۔

ایکس سروس مین کے لئے وزیراعظم معاونت پیکج کے تحت سروس ڈیوز کی ادائیگی کی سمری پر غور کیا جائے گا، دارالحکومت میں خصوصی عدالتوں کے قیام اور احتساب عدالت نمبر 3 کی تشکیل نو کی سمری پر غور ہوگا۔

وفاقی کابینہ کراچی پورٹ ٹرسٹ کے چیئرمین کی تعیناتی، کابینہ قومی ادارہ برائے صحت اسلام آباد کے بورڈ آف گورنرز کی تشکیل کی منظوری دے گی۔ کابینہ وفاقی دارالحکومت میں میڈیکل تعلیم کے لئے سیٹس کے کوٹہ میں ردوبدل پر غور کرے گی۔

کابینہ قومی فنڈ برائے ثقافت و ورثہ کے بورڈ آف گورنرز کی تعیناتی کی منظوری دے گی جب کہ کابینہ پاکستان کسٹمز اور آذربائیجان کی اسٹیٹ کسٹمز کمیٹی کے درمیان معاہدے کی منظوری دے گی۔

علاوہ ازیں کابینہ کمیٹی برائے ریاستی ملکیتی ادارہ جات کے 17 دسمبر 2024 کے اجلاس کے فیصلوں کی توثیق کی جائے گی، سی سی ایل سی کے 22 جنوری کے اجلاس کے فیصلوں کی بھی توثیق ہوگی۔