ن لیگ کے رہنما سینیٹر عرفان صدیقی نے اسلام آباد میں میڈیا سے گفتگو کرتے ہوئے کہا کہ جوڈیشنل کمیشن سے متعلق کوئی فیصلہ نہیں کیا گیا۔

سینیٹر عرفان صدیقی نے میڈیا کو بتایا کہ پی ٹی آئی نے مذاکرات سے انکار کیا ہے، مذاکراتی کمیٹی میں 7 جماعتوں کی نمائندگی ہے.

انہوں نے کہا کہ اپوزیشن نے اپنے تحریری مطالبات دینے میں 42 روز لگائے، اپوزیشن نے ہم سے 7 روز میں جوڈیشل کمیشن کے قیام کا مطالبہ کیا ہے۔

اپوزیشن کے مطالبات پر سنجیدگی سے مشاورت کی گئی، مذاکرات ختم کرنے کا اعلان افسوسناک ہے۔

ان کا کہنا تھا کہ اسپیکر قومی اسمبلی کو کمیٹی اجلاس کیلئے 28 جنوری کی تاریخ دے دی گئی تھی، سیاست میں مذاکرات جمہوری عمل کا حصہ ہوتے ہیں۔

ن لیگی رہنما کے مطابق ہم نے صبروتحمل سے مذاکرات کے عمل کو آگے بڑھایا ہے، پی ٹی آئی نے مذاکرات کیلئے آنے اور جانے میں بیتابی کا مظاہرہ کیا۔

بانی پی ٹی آئی کے ٹوئٹس کے باوجود ہم نے مذاکرات جاری رکھے، پی ٹی آئی سے اپیل ہے کہ مذاکرات کا راستہ نہ چھوڑیں۔

ہماری کمیٹی آج بھی قائم ہے، مزید مشاورت کا سلسلہ جاری رہے گا، پی ٹی آئی کو کسی چیز پر اعتراض ہے تو وہ تحریری شکل میں پیش کر دے۔

سینیٹر عرفان صدیقی کا مزید کہنا تھا کہ صحافیوں کے حقوق کیلئے پہلے بھی آوازاٹھائی آئندہ بھی اٹھائیں گے، حکومت اظہار رائے کی آزادی پر مکمل یقین رکھتی ہے۔