اسلام آباد: آذربائیجان کے صدر الہام علیوف نے یومِ پاکستان کے موقع پر وزیراعظم شہباز شریف اور پاکستانی عوام کو مبارکباد پیش کی ہے۔

آذربائیجان کے صدر الہام علیوف نے یوم پاکستان کے موقع پر وزیر اعظم شہباز شریف کو خط لکھا جس میں انہوں نے پاکستان اور آذربائیجان کے درمیان تذویراتی شراکت داری اور باہمی تعاون کو مزید وسعت دینے کے عزم کا اظہار کیا۔

صدر الہام علیوف نے اپنے تہنیتی پیغام میں لکھا کہ معیشت، ٹرانسپورٹ، لاجسٹکس، توانائی، سرمایہ کاری، دفاعی صنعت اور دیگر شعبوں میں دونوں ممالک کی مشترکہ کوششیں دوطرفہ تعلقات کے لیے کلیدی اہمیت رکھتی ہیں۔

انہوں نے عالمی امور پر پاکستان اور آذربائیجان کے یکساں مؤقف اور باہمی تعاون کو دونوں ممالک کے درمیان بھائی چارے کی علامت قرار دیا۔

صدرِ آذربائیجان نے کہا کہ دونوں ممالک کے تعلقات احترام، اعتماد، ثقافتی اقدار اور یکجہتی پر مبنی ہیں جب کہ اعلیٰ سطحی دورے اور ملاقاتیں ان تعلقات کو مزید مضبوط بنا رہی ہیں۔

انہوں نے گزشتہ ماہ وزیراعظم شہباز شریف کے آذربائیجان کے سرکاری دورے کے دوران ہونے والی ملاقاتوں اور معاہدوں کو دوطرفہ تعاون کے فروغ میں ایک مثبت قدم قرار دیا۔

صدر علیوف نے اس امید کا اظہار کیا کہ مستقبل میں پاکستان اور آذربائیجان اپنے تعلقات کو مزید وسعت دیں گے۔

آخر میں انہوں نے وزیراعظم شہباز شریف کی صحت اور کامیابی اور پاکستانی عوام کے لیے امن، خوشحالی، اور ترقی کی دعا کی۔