ایک حالیہ رپورٹ میں پاکستان کے سابق وزیر اعظم اور بانی پی ٹی آئی کی سیاسی زندگی، ذاتی فیصلوں اور نظریاتی مؤقف پر تفصیلی تجزیہ پیش کیا گیا ہے۔ رپورٹ میں انہیں شدت پسندی کے فروغ، جمہوری اقدار کی خلاف ورزی، آزادی اظہار کو دبانے اور بدعنوانی میں ملوث ہونے کے الزامات کا سامنا کرنے والے رہنما کے طور پر پیش کیا گیا ہے۔

شدت پسندی اور تحریک طالبان پاکستان سے مبینہ ہمدردی

رپورٹ میں پی ٹی آئی بانی پر کالعدم تحریک طالبان پاکستان کے ساتھ نرم رویہ اختیار کرنے کا الزام عائد کیا گیا ہے۔ ان کے فوجی آپریشنز کی مخالفت نے انہیں “طالبان خان” کا خطاب دلوایا۔ رپورٹ میں 2013 میں چرچ پر خودکش حملے کے بعد ان کے متنازعہ بیانات کا حوالہ دیا گیا ہے، جس میں انہوں نے حملے کا ذمہ دار کسی خفیہ سازش کو ٹھہرایا۔ اس کے علاوہ، انسدادِ ڈرون حملوں کے خلاف ان کے احتجاج کو شدت پسندوں کے لیے عالمی سطح پر ہمدردی حاصل کرنے کا ذریعہ قرار دیا گیا ہے۔

خواتین کے حقوق اور جنسی تشدد پر متنازعہ بیانات

رپورٹ میں پی ٹی آئی بانی کو خواتین کے حقوق سے متعلق متنازعہ خیالات رکھنے والا رہنما قرار دیا گیا ہے۔ ان کے 2021 میں دیے گئے بیانات، جن میں انہوں نے خواتین کے لباس کو جنسی تشدد کی وجہ بتایا، کو انسانی حقوق کے کارکنوں نے شدید تنقید کا نشانہ بنایا۔

افغانستان میں طالبان کی فتح پر خوشی کا اظہار

2021 میں جب امریکہ نے افغانستان سے اپنی افواج کا انخلا کیا، تو پی ٹی آئی بانی نے طالبان کے اقتدار میں واپسی کو “غلامی کی زنجیروں سے نجات” قرار دیا۔ رپورٹ میں کہا گیا کہ ان کے اس بیان پر نہ صرف بین الاقوامی سطح پر بلکہ پاکستان میں بھی شدید ردعمل آیا، کیونکہ یہ طالبان کی کامیابی کو جواز فراہم کرنے کے مترادف سمجھا گیا۔

ملالہ یوسفزئی پر حملے کی مذمت سے گریز

رپورٹ میں 2012 میں نوبل انعام یافتہ ملالہ یوسفزئی پر ٹی ٹی پی کے حملے کے بعد پی ٹی آئی بانی کے ردعمل کو بھی تنقید کا نشانہ بنایا گیا ہے۔ رپورٹ میں کہا گیا کہ انہوں نے حملے کے ذمہ داروں کو واضح طور پر مذمت کرنے سے گریز کیا اور معاملے کو ایک سماجی مسئلہ قرار دے کر ٹی ٹی پی کا نام لینے سے اجتناب کیا۔

مغرب اور امریکہ مخالف بیانات

رپورٹ میں کہا گیا کہ پی ٹی آئی بانی نے بارہا مغربی ثقافت کو تنقید کا نشانہ بنایا اور امریکہ کو اپنی حکومت کے خاتمے کا ذمہ دار ٹھہرایا۔ تاہم، رپورٹ میں تضاد کی نشاندہی کرتے ہوئے کہا گیا کہ ایک وقت میں وہ سابق امریکی صدر ڈونلڈ ٹرمپ کی پالیسیوں کو نسل پرست اور مسلم مخالف قرار دیتے تھے، لیکن بعد میں ان کی پارٹی نے امریکی ریپبلکن پارٹی سے تعلقات بہتر کرنے کی کوشش کی۔

ذاتی تنازعات

پی ٹی آئی بانی کے حوالے سے ان کی مبینہ بیٹی ٹیرین وائٹ کا معاملہ بھی رپورٹ میں شامل کیا گیا ہے۔ رپورٹ میں کہا گیا کہ امریکی عدالت نے انہیں ٹیرین وائٹ کا والد قرار دیا، لیکن انہوں نے اس حقیقت کو ہمیشہ مسترد کیا اور کبھی عوامی سطح پر اپنی بیٹی کو تسلیم نہیں کیا۔

بدعنوانی، توشہ خانہ اسکینڈل اور القادر ٹرسٹ کیس

:رپورٹ میں کہا گیا کہ پی ٹی آئی بانی اور ان کی اہلیہ بشریٰ بی بی سمیت فرح گوگی پر کرپشن کے سنگین الزامات ہیں۔ رپورٹ کے مطابق

انہوں نے توشہ خانہ سے ملنے والے قیمتی تحائف کو غیر قانونی طور پر فروخت کیا اور ان سے حاصل شدہ منافع کو اپنے اثاثوں میں ظاہر نہیں کیا۔
القادر ٹرسٹ کیس میں پی ٹی آئی بانی اور ان کی اہلیہ پر ایک ریئل اسٹیٹ ٹائیکون سے رشوت لینے کا الزام ہے۔

سول نافرمانی اور عوام کو اکسانا

رپورٹ میں کہا گیا کہ پی ٹی آئی بانی نے کئی مواقع پر عوام کو سول نافرمانی پر اکسایا۔

2014 میں پی ٹی وی پر حملہ

2023 میں 9 مئی کو ہونے والے پرتشدد مظاہرے، جن میں حکومتی اور عسکری تنصیبات کو نشانہ بنایا گیا۔

عوام سے بجلی کے بل جلانے کی اپیل، لیکن خود اپنا بل ادا کرنا۔

عدلیہ کی حکم عدولی اور قانون کی خلاف ورزی

رپورٹ میں کہا گیا کہ پی ٹی آئی بانی نے کئی بار عدالتی احکامات کو مسترد کیا اور اپنے مقدمات میں عدالتوں کے فیصلوں کو ماننے سے انکار کیا۔ خاص طور پر توشہ خانہ کیس میں گرفتاری سے بچنے کے لیے مزاحمت اور عدالتی کارروائی میں رکاوٹ ڈالنے کے الزامات لگائے گئے ہیں۔

آزادی اظہار پر قدغن اور میڈیا سنسرشپ

رپورٹ میں ان کے دورِ حکومت میں آزادی صحافت پر پابندیوں کا حوالہ دیتے ہوئے کہا گیا کہ: صحافیوں پر دباؤ ڈالنے اور انہیں گرفتار کرنے کے واقعات، میر شکیل الرحمٰن، حامد میر، اور طلعت حسین جیسے سینئر صحافیوں کو نشانہ بنایا گیا، یوٹیوبرز اسد طور اور احمد نورانی پر حملے، سعودی عرب کے ساتھ تعلقات میں کشیدگی۔

رپورٹ میں کہا گیا کہ پی ٹی آئی بانی کے غیر سفارتی رویے کی وجہ سے پاکستان اور سعودی عرب کے تعلقات میں تنازعہ پیدا ہوا، انہوں نے سعودی قیادت پر نکتہ چینی کی، جس کی وجہ سے پاکستان کو مشکلات کا سامنا کرنا پڑا، پاکستان نے سعودی عرب کو 3 بلین ڈالر کے قرض کی واپسی میں تاخیر کی، جس پر سعودی حکومت نے سخت ردعمل دیا۔

حتمی جائزہ

رپورٹ “دی ریئلٹی آف پی ٹی آئی فاؤنڈر” میں پی ٹی آئی بانی پر شدت پسندی کو فروغ دینے، جمہوریت کو کمزور کرنے، کرپشن میں ملوث ہونے، اور قومی مفادات کو نقصان پہنچانے کے الزامات عائد کیے گئے ہیں۔

ان کے حامی انہیں کرپشن کے خلاف ایک انقلابی لیڈر کے طور پر دیکھتے ہیں، جبکہ ان کے ناقدین انہیں ایک متنازعہ شخصیت قرار دیتے ہیں، جنہوں نے سیاسی اور سماجی تقسیم کو ہوا دی۔

پاکستان کی بدلتی ہوئی سیاست میں ان کا کردار کس طرح سامنے آئے گا، یہ آنے والا وقت ہی بتائے گا۔