گورنر سندھ کامران خان ٹیسوری نے گورنر ہاؤس میں پانچویں افطار ڈنر کی تقریب کا انعقاد کیا، جس میں کراچی کے شہریوں کے علاوہ پنجاب، خیبر پختونخواہ اور مختلف صوبوں سے لوگ بھی شریک ہوئے۔

گورنر سندھ نے تقریب میں شریک افراد کا خیرمقدم کیا اور ان کے ساتھ افطاری کی۔

شرکاء نے گورنر سندھ کے ساتھ سیلفیاں بھی بنوائیں اور اس موقع پر خوشی کا اظہار کیا۔ ایک شہری نے کہا کہ گورنر سندھ کے ہمراہ افطاری کر کے ہمیں بہت خوشی ہوئی ہے۔

گورنر سندھ نے افطار کے شرکاء سے خطاب کرتے ہوئے کہا کہ مسائل ضرور ہیں لیکن میں یقین دلاتا ہوں کہ یہ مسائل جلد ختم ہوجائیں گے۔

انہوں نے مزید کہا کہ آج گورنر ہاؤس میں غریب افراد کے 50 ہزار بچوں کو آئی ٹی کے مفت کورسز کرائے جا رہے ہیں جن میں سے طلباء پانچ سے آٹھ لاکھ روپے ماہانہ کما رہے ہیں۔

کامران خان ٹیسوری نے کہا کہ گورنر ہاؤس سے مستحقین میں راشن بیگز تقسیم کیے جا رہے ہیں اور امید کی گھنٹی سے لوگوں کے مسائل حل کیے جا رہے ہیں۔

انہوں نے یہ بھی کہا کہ گورنر ہاؤس کو یہ اعزاز حاصل ہے کہ یہاں انسانیت کا احترام ہوتا ہے۔

تقریب کے دوران گورنر سندھ نے اعلان کیا کہ آج گورنر ہاؤس کی دیواروں کو روشنیوں سے سجایا جا رہا ہے اور رمضان المبارک کی آمد کی خوشی میں گورنر ہاؤس جگمگائے گا۔

گورنر سندھ نے شرکاء کو حوصلہ دیتے ہوئے کہا کہ حوصلہ نہیں چھوڑنا، امید نہیں چھوڑنی، ہارنا نہیں ہے، ہمت کرنی ہے۔

 انہوں نے مزید کہا کہ اس صوبہ میں کسی کے ساتھ ناانصافی نہیں ہونے دوں گا، اور جو بھی پاکستان پر میلی نظر ڈالے گا، میرے نوجوان اس سے مقابلہ کریں گے۔

تقریب کے آخر میں پانچویں افطاری کی قرعہ اندازی میں مردان کے رہائشی شہباز ولد جاوید احمد کا عمرہ کا ٹکٹ نکلا، جب کہ محمد جاوید ولد محمد شریف کا اسمارٹ سٹی کے 120 گز کا پلاٹ نکلا۔