سوات: عیدالفطر کے موقع پر ملک بھر سے بڑی تعداد میں سیاح سوات کے مختلف سیاحتی مقامات کا رخ کر رہے ہیں۔

ترجمان اپر سوات ڈویلپمنٹ اتھارٹی سعید الرحمان کے مطابق گزشتہ چار دنوں کے دوران 64 ہزار 901 گاڑیوں کے ذریعے چار لاکھ سے زائد سیاح سوات پہنچے۔

ترجمان اپر سوات ڈویلپمنٹ اتھارٹی نے بتایا کہ سوات میں سب سے زیادہ سیاحوں کا رش کالام اور مالم جبہ کے سیاحتی مقامات پر دیکھنے کو ملا، جہاں سیاحوں نے خوبصورت مناظر کا لطف اٹھایا۔

انہوں نے کہا کہ عید کے چار دنوں میں 101 غیر ملکی سیاحوں نے بھی سوات کے مختلف مقامات کی سیر کی۔ ان غیر ملکی سیاحوں میں افغانستان، اردن، صومالیہ، کینیا، روس، جاپان، سعودی عرب، چین، ملائیشیا، سوئٹزرلینڈ اور دیگر ممالک کے شہری شامل تھے۔

سعید الرحمان کا کہنا تھا کہ سیاحوں کی سہولت کے لیے ٹورازم پولیس اہلکار مختلف سیاحتی مقامات پر ڈیوٹی سرانجام دے رہے ہیں جب کہ ٹورازم ہیلپ لائن 1422 چوبیس گھنٹے فعال ہے تاکہ سیاحوں کو کسی بھی قسم کی مدد فراہم کی جاسکے۔

ترجمان کہتے ہیں کہ کہ کالام میں بھاری مشینری اور فیلڈ اسٹاف کسی بھی ہنگامی صورت حال سے نمٹنے کے لیے الرٹ ہیں۔

انہوں نے یہ بھی بتایا کہ سیاحت کے فروغ کے لیے صوبائی حکومت مؤثر اقدامات کر رہی ہے اور اپر سوات ڈویلپمنٹ اتھارٹی سمیت سوات پولیس کے بہترین انتظامات کی بدولت ٹریفک کی روانی برقرار رہی۔

سعید الرحمان نے مزید کہا کہ سیاحوں کو سہولت فراہم کرنے کے لیے سوات کے باب سوات اور مٹہ میں ٹورسٹ سہولت مرکز قائم کیا گیا ہے تاکہ سیاحوں کو بہترین خدمات فراہم کی جاسکیں۔