کراچی: میئر کراچی مرتضیٰ وہاب کی پریس کانفرنس پر قائد حزب اختلاف سندھ علی خورشیدی کا شدید ردعمل سامنے آگیا۔

میئر کراچی مرتضیٰ وہاب کی حالیہ پریس کانفرنس پر قائد حزب اختلاف سندھ اسمبلی علی خورشیدی نے سخت ردعمل دیتے ہوئے الزام عائد کیا ہے کہ میئر کراچی عوامی خدمت کے بجائے الزام تراشی کی سیاست میں مصروف ہیں۔

علی خورشیدی نے کہا کہ میئر کے زبان کی لڑکھڑاہٹ اس بات کا اشارہ ہے کہ اقتدار کا چراغ بجھنے کو ہے۔ افسوس ہے کہ کراچی جیسے حساس شہر کا میئر مسائل حل کرنے کے بجائے سیاسی تماشے میں الجھا ہوا ہے۔

انہوں نے دعویٰ کیا کہ عنقریب کراچی میونسپل کارپوریشن (KMC) اور شہری اداروں پر حق پرستی کا پرچم لہرائے گا۔ 27 دسمبر کو پیپلزپارٹی کے جیالے شہر میں آگ و خون کی ہولی کھیلتے رہے اور کراچی کے عوام ان واقعات کو نہ بھولیں گے نہ بھولنے دیں گے۔

قائد حزب اختلاف کا کہنا تھا کہ پیپلز پارٹی آئندہ بلدیاتی انتخابات میں اپنے امیدوار تک نامزد کرنے کی پوزیشن میں نہیں ہوگی جب کہ کنٹونمنٹ بورڈز کے انتخابات ان کے لیے نوشتہ دیوار ثابت ہوں گے۔

انہوں نے مزید کہا کہ نومولود سیاسی اداکاروں کو ایم کیو ایم کی شہرت اور سیاسی بلندگی کا خوف ستا رہا ہے، کراچی کے شہری ادارے کسی کے باپ کی جاگیر نہیں بلکہ اس شہر کے بچوں کا حق ہیں۔