وزیراعظم پاکستان شہباز شریف نے 10 مئی کو “یوم معرکہ حق” کے طور پر منانے کا اعلان کیا ہے، جو ہر سال جوش و خروش اور ملی وحدت کے ساتھ منایا جائے گا۔

وزیراعظم نے کہا کہ یوم معرکہ حق پاکستان کی مسلح افواج کی پیشہ ورانہ صلاحیتوں کا اعتراف ہے، جنہوں نے دشمن کے خلاف جرات مندانہ کارروائیاں کرکے ملک کے دفاع کو مضبوط بنایا۔

وزیراعظم نے اپنے بیان میں مزید کہا کہ ہمارے بہادر فوجیوں کی پیشہ ورانہ صلاحیتوں نے پاکستان کے سر کو فخر سے بلند کر دیا ہے اور قوم کو اپنی افواج پر مکمل اعتماد ہے.

وزیراعظم نے اعلان کیا کہ 16 مئی کو یوم تشکر کے سلسلے میں خصوصی نفل عبادات کا اہتمام کیا جائے گا، جس میں اللہ کی بارگاہ میں سجدہ ریز ہو کر ملک و قوم کی ترقی اور خوشحالی کے لیے دعائیں کی جائیں گی۔

مزید پڑھیں: بُنْيَانٌ مَّرْصُوْصٌ آپریشن مکمل، معرکہ حق کا نام دیدیا گیا، آئی ایس پی آر

انہوں نے کہا کہ یہ دن ہمارے بہادر شہداء کی قربانیوں کو یاد کرنے کا دن ہے اور ہم ان کی قربانیوں کو کبھی نہیں بھولیں گے۔

مزید برآں وزیراعظم نے معرکہ حق کے دوران شہید ہونے والے فوجیوں اور شہریوں کے اہل خانہ کے لیے شہداء پیکج کا اعلان کیا۔

انہوں نے کہا کہ متاثرہ گھروں اور شہید مساجد کی تعمیر کا عمل بھی وفاقی حکومت کی جانب سے کیا جائے گا تاکہ ان کی تکالیف کو کم کیا جا سکے۔

وزیر اعظم شہباز شریف نے اس بات پر بھی زور دیا کہ بھارت کی جانب سے کیے گئے حملے کے بعد متاثرہ علاقوں کی بحالی اور ترقی کے لیے تمام ضروری اقدامات کیے جائیں گے۔