اسلام آباد: پاکستان پیپلز پارٹی کے چیئرمین بلاول بھٹو زرداری نے کہا ہے کہ یومِ تکبیر قوم کے عزم، اتحاد اور خودمختاری کی علامت ہے۔

چیئرمین بلاول بھٹو نے یومِ تکبیر کے موقع پر اپنے خصوصی پیغام میں پاکستان کے ایٹمی پروگرام سے وابستہ تمام افراد کو زبردست خراجِ تحسین پیش کیا اور کہا کہ یہ دن صرف فخر کا موقع نہیں بلکہ قوم کے غیر متزلزل عزم اور خودمختاری کی علامت ہے۔

انہوں نے کہا کہ پاکستان کو ایٹمی طاقت بنانے میں سائنسدانوں، انجینئرز، مسلح افواج اور دور اندیش سیاسی قیادت کا کردار ناقابلِ فراموش ہے۔

بلاول بھٹو نے قائدِ عوام شہید ذوالفقار علی بھٹو کو بھی خراجِ عقیدت پیش کرتے ہوئے کہا کہ انہوں نے عالمی دباؤ کے باوجود جوہری پروگرام کی بنیاد رکھ کر آنے والی نسلوں کو محفوظ مستقبل دیا۔

چیئرمین پیپلز پارٹی نے شہید محترمہ بینظیر بھٹو کی بصیرت کو بھی سراہا، جنہوں نے اپنے دورِ حکومت میں ایٹمی پروگرام کی تحفظ اور پیشرفت کو یقینی بنایا۔

ان کا کہنا تھا کہ ہمارا ایٹمی دفاع ان شہداء کی امانت ہے، جو اپنی بے مثال قربانیوں سے ہمیں ایک مضبوط ڈھال دے گئے، ہمیں کبھی نہیں بھولنا چاہیے کہ اس پروگرام کے پیچھے کتنی جدوجہد اور قربانیاں ہیں۔

بلاول بھٹو نے اس عزم کا اعادہ کیا کہ پاکستان پیپلز پارٹی ہمیشہ ایک خوددار، محفوظ اور ترقی یافتہ پاکستان کے لیے کھڑی رہی ہے اور کھڑی رہے گی۔

چیئرمین پی پی نے کہا کہ پارٹی نے نہ صرف ایٹمی طاقت کی بنیاد رکھی بلکہ معیشت، جمہوریت اور سماجی انصاف جیسے اہم محاذوں پر بھی عوام کی آواز بنی۔

انہوں نے پیغام کے اختتام پر کہا کہ یومِ تکبیر ہمیں یاد دلاتا ہے کہ جب قوم متحد ہو تو وہ ہر چیلنج کا سامنا کر سکتی ہے، آئیے آج کے دن ہم اپنے بانی اجداد کے خوابوں کی تکمیل کے لیے نئے عزم کے ساتھ آگے بڑھیں اور ایک ایسا پاکستان تعمیر کریں جو امن، ترقی اور عوام کی امیدوں کا حقیقی عکس ہو۔