پاکستان نے بھارت کی جارحیت کے جواب میں جوابی کارروائی کرتے ہوئے “آپریشن بُنْيَانٌ مَّرْصُوْصٌ” کے تحت ایک بڑا سائبر حملہ کیا ہے، جس کے نتیجے میں بھارت کا تقریباً 70 فیصد پاور گرڈ ناکارہ ہو گیا اور ملک بھر میں بجلی کی سپلائی متاثر ہو گئی ہے۔

سیکیورٹی ذرائع کے مطابق یہ سائبر حملہ نہایت منظم اور تکنیکی مہارت کے ساتھ کیا گیا، جس نے نہ صرف شہری مراکز بلکہ دیہی علاقوں کو بھی اپنی لپیٹ میں لے لیا۔

بھارت کے توانائی کے بنیادی ڈھانچے کو نشانہ بنانے والے اس حملے نے ملک بھر میں بجلی کی ترسیل کو بری طرح مفلوج کر دیا ہے۔

یہ سائبر حملہ آپریشن بُنْيَانٌ مَّرْصُوْصٌ (آہنی دیوار) کا حصہ ہے، جس کا آغاز پاکستان نے بھارت کی حالیہ عسکری جارحیت کے جواب میں کیا ہے۔ اس آپریشن کے تحت پاکستان پہلے ہی بیاس کے علاقے میں براہموس میزائل اسٹوریج سائٹ، ادھم پور ایئر بیس، اور دیگر عسکری اہداف کو تباہ کر چکا ہے۔

پاکستانی سیکیورٹی اداروں نے اس حملے کو دفاعی حکمتِ عملی کا حصہ قرار دیتے ہوئے واضح کیا ہے کہ یہ تمام اقدامات بھارت کی جارحیت کا مؤثر اور ضروری جواب ہیں۔ حکام کا کہنا ہے کہ قومی سلامتی، خودمختاری اور شہریوں کے تحفظ کے لیے ہر ممکن اقدام اٹھایا جائے گا۔

بھارتی میڈیا اور مقامی رپورٹس کے مطابق کئی ریاستوں میں ٹرانسپورٹ، اسپتال، مواصلاتی نظام اور دیگر بنیادی سہولیات کو شدید متاثر ہونے کی اطلاعات موصول ہوئی ہیں۔ کئی گھنٹوں پر محیط اس بلیک آؤٹ نے بھارتی حکام کو ہنگامی حالت میں لا کھڑا کیا ہے، جب کہ پاکستان کی جانب سے سائبر حملے کی ذمہ داری لینے یا سرکاری بیان دینے سے قبل ہی عالمی سطح پر اس حملے کی بازگشت سنائی دے رہی ہے۔