اسلام آباد: صدر مملکت آصف علی زرداری نے کہا ہے کہ پارلیمان طرز حکمرانی مؤثر، جمہوری ادارے مستحکم کرنے میں مدد دے سکتی ہے۔

پارلیمان کے عالمی دن کے موقع پر صدر مملکت آصف علی زرداری اور وزیر اعظم شہباز شریف نے اپنے خصوصی پیغامات میں جمہوریت، شفافیت اور عوامی نمائندگی کی اہمیت کو اجاگر کیا۔

صدر آصف علی زرداری نے اپنے جاری کردہ پیغام میں کہا کہ پارلیمان عوام کی خودمختار نمائندہ اور آئینی اقدار کی نگہبان ہوتی ہے۔

 انہوں نے اس عزم کا اظہار کیا کہ پاکستان جمہوریت، آزادی، شمولیت، رواداری اور معاشی و سماجی انصاف کے اصولوں پر کاربند رہے گا۔

صدر نے کہا کہ پارلیمنٹ قومی پالیسی سازی میں کلیدی کردار ادا کرتی ہے جبکہ شفافیت، جوابدہی اور شہریوں کے بنیادی حقوق کے تحفظ کو یقینی بنانے میں بھی اس کا اہم کردار ہے۔

انکا کہنا تھا کہ قانون ساز اداروں کی یہ ذمے داری ہے کہ وہ جمہوری اقدار کا تحفظ کریں اور موثر نگرانی کے ذریعے عوامی احتساب کا سلسلہ جاری رکھیں۔

صدر مملکت نے اس اہم دن کے موقع پر پارلیمان کی کاوشوں کو سراہتے ہوئے کہا کہ آئیے ایسا پاکستان تعمیر کریں جہاں جمہوریت فروغ پائے، ادارے مضبوط ہوں اور ہر شہری کی آواز عزت سے سنی جائے۔

’پارلیمنٹ ہمارے جمہوری نظام میں مرکزی مقام رکھتی ہے‘

دوسری جانب وزیر اعظم شہباز شریف نے بھی اپنے پیغام میں کہا کہ پارلیمان ہمارے جمہوری نظام کا مرکز ہے، حالیہ عالمی کشیدگی کے تناظر میں پاکستانی وفد نے عالمی فورمز پر ملک کا مؤقف بھرپور انداز میں پیش کیا۔

وزیر اعظم نے پارلیمانی شفافیت اور عوامی رسائی کو بہتر بنانے کے لیے جدید ٹیکنالوجی کے استعمال کو سراہا اور کہا کہ قانون سازی اور قائمہ کمیٹیوں کے ذریعے احتساب اور شفافیت کو یقینی بنایا جا رہا ہے۔

انہوں نے مزید کہا کہ پاکستان میں خواتین ارکان پارلیمنٹ قائدانہ عہدوں پر فائز ہو کر جمہوریت کے استحکام میں اہم کردار ادا کر رہی ہیں۔