راولپنڈی: سیکیورٹی فورسز نے جنوبی وزیرستان کے علاقے سراروغہ میں دہشت گردوں کی موجودگی کی اطلاع پر انٹیلی جنس بیسڈ آپریشن کے دوران بھارتی حمایت یافتہ 11 دہشت گرد ہلاک اور 7 زخمی ہوگئے جب کہ اس دوران پاک فوج کے دو جوان وطن پر قربان ہوگئے۔

پاک فوج کے شعبہ تعلقات عامہ (آئی ایس پی آر) کے مطابق آپریشن دہشت گردوں کے ایک منظم گروہ کے خلاف کیا گیا جو جنوبی وزیرستان میں تخریبی کارروائیوں میں ملوث تھا۔

آئی ایس پی آر نے بتایا کہ آپریشن کے دوران شدید فائرنگ کے تبادلے میں میجر سید معیز عباس شاہ اور لانس نائیک جبران اللہ نے جامِ شہادت نوش کیا۔

شہداء کی تفصیلات

آئی ایس پی آر کے مطابق میجر سید معیز عباس شاہ شہید کا تعلق ضلع چکوال سے تھا۔ ان کی عمر 37 سال تھی اور وہ گزشتہ 14 سال سے پاک فوج میں خدمات انجام دے رہے تھے۔

ترجمان پاک فوج کا کہنا تھا کہ شہید میجر دہشت گردوں کے خلاف متعدد کامیاب آپریشنز میں حصہ لے چکے تھے۔ ان کے پسماندگان میں اہلیہ اور دو بیٹے شامل ہیں۔

آئی ایس پی آر نے مزید بتایا کہ لانس نائیک جبران اللہ شہید کا تعلق ضلع بنوں سے تھا۔ ان کی عمر 26 سال تھی اور وہ 8 سال سے ملکی دفاع کے فرائض سرانجام دے رہے تھے۔ ان کے پسماندگان میں اہلیہ اور تین بیٹے شامل ہیں۔

آئی ایس پی آر نے کہا علاقے میں مزید دہشت گردوں کی موجودگی کے پیش نظر کلیئرنس آپریشن جاری ہے تاکہ ممکنہ خوارج کا مکمل صفایا کیا جاسکے۔

آئی ایس پی آر نے اس بات کا اعادہ کیا کہ سیکیورٹی فورسز ملک دشمن عناصر اور بھارتی حمایت یافتہ دہشت گردوں کے مکمل خاتمے کے لیے پرعزم ہیں۔

ترجمان پاک فوج کا مزید کہنا تھا کہ شہداء کی قربانیاں ہمارے قومی عزم کو مزید مضبوط کرتی ہیں اور قوم اپنے ان سپوتوں کی قربانیوں کو کبھی نہیں بھولے گی۔