اسلام آباد: بین الاقوامی مالیاتی فنڈ (آئی ایم ایف) کی نمائندہ ماہیربینسی نے کہا ہے کہ پاکستان میں اقتصادی استحکام کی رفتار حوصلہ افزا ہے۔

نمائندہ آئی ایم ایف ماہیربینسی نے سسٹین ایبل ڈویلپمنٹ پالیسی انسٹیٹیوٹ (ایس ڈی پی آئی) میں خطاب کرتے ہوئے کہا کہ پاکستان کی معیشت درست سمت میں گامزن ہے اور قرض پروگرام کے تحت کارکردگی قابلِ تعریف رہی ہے۔

انہوں نے کہا کہ اقتصادی استحکام کی رفتار حوصلہ افزا ہے، تاہم معیشت کو مستحکم رکھنے کے لیے ساختی اصلاحات ناگزیر ہیں۔

ماہیربینسی نے ماحولیاتی شعبے میں ہونے والی پیشرفت کو بھی سراہتے ہوئے کہا کہ پاکستان نے اس میدان میں قابلِ ذکر کامیابیاں حاصل کی ہیں۔

آئی ایم ایف نے عالمی سطح پر بڑھتی تجارتی کشیدگی، جغرافیائی تقسیم اور کمزور بین الاقوامی تعاون کو غیر یقینی صورتِ حال کی بڑی وجوہات قرار دیا۔

 ان کا کہنا تھا کہ ایسے چیلنجز کے مقابلے کے لیے دور اندیش اور دانشمندانہ پالیسی اقدامات کی فوری ضرورت ہے۔

انہوں نے مزید کہا کہ ابتدائی پالیسی اقدامات نے میکرواکنامک استحکام کی بحالی میں اہم کردار ادا کیا لیکن پائیدار ترقی کے لیے منصفانہ ٹیکس نظام اور بہتر کاروباری ماحول کلیدی اہمیت رکھتے ہیں۔