اداکارہ حمیرا اصغر کے بھائی اور بہنوئی میت لینے کراچی پہنچ گئے۔ ایس ایس پی ساؤتھ محظور علی نے کہاہے کہ اس سلسلے میں قانونی کارروائی جاری ہے۔

اپنے دفتر میں میڈیا سے گفتگوکرتے ہوئے انہوں نے کہاکہ ورثاء میت لاہور لے جانا چاہتے ہیں، انہوں نے فوری کسی شک و شبے کا اظہار نہیں کیا۔

انہوں نے کہاکہ اکتوبر 2024 کے بعد سے خاتون کے رابطے منقطع تھے۔ جس عمارت میں حمیرا اصغر کا فلیٹ تھا وہاں ہر فلور پر2 فلیٹس بنے ہیں ۔

پڑوس کے فلیٹ میں مقیم افراد بھی فروری 2025 میں بیرون ملک سے واپس آئے۔ممکنہ طور پرلاش سے اٹھنے والا تعفن اس ہی وجہ سے کسی کو محسوس نہیں ہوا۔

انہوں نے کہاکہ حمیرا اصغر خود فیملی سے رابطہ کرتی تھیں،فیملی ان سے رابطے میں نہیں رہتی تھی۔

غلط تاثردیاگیاکہ ہم لاش وصول نہیں کرناچاہتے، حمیرا کی اپنی پہچان تھی، بھائی نویداصغر

بعدا ازاں اداکارہ حمیرا کے چھوٹے بھائی نوید کی  رمضان چھیپا کے ہمراہ میڈیا سے گفتگوکی۔

نوید اصغر کہاکہ میڈیا میں ایک تصور دیا گیا کہ والدین لاش وصول نہیں کررہے۔ ان کا کہناتھاکہ لاش اگر پولیس کی کسٹڈی میں ہو تو قانونی تقاضے مکمل کرنے پڑتے ہیں۔

انہوں نے کہاکہ ہم 3 دن سے چھیپا صاحب اور پولیس سے رابطے میں تھے۔ ان کا کہناتھاکہ ایک ماہ قبل میری پھوپھو کی روڈ ایکسیڈنٹ میں انتقال ہوا ،والدین اس وجہ سے بھی کافی پریشان تھے ۔

نوید اصغر کہاکہ اچانک موت ہونا, پھر میڈیا کی کالز آنا , کافی مشکل مرحلہ تھا ۔ انہوں نے کہاکہ ہم نے اب چھیپاسے رابطہ کرکے باڈی وصول کی۔

ان کا کہناتھاکہ یہ غلط تاثر دیا گیا ہے کہ والدین کا قطع تعلق تھا۔انہوں نے کہاکہ میری بہن خودمختار تھیں, اس کی  اپنی پہچان تھی ،اس نے اپنی محنت سے کامیابی حاصل کی۔

حمیرا میری بیٹی ہے ، فیملی کے اندرونی معاملات پر بات نہ کی جائے، رمضان چھیپا کی درخواست 
اس موقع پر رمضان چھیپانے کہاکہ نوید اصغر مجھ سے مستقل رابطے میں تھے ۔سوشل میڈیا پر غلط پروپیگنڈہ کیا گیا  کہ حمیرا کے والدین, بہن بھائی ناراض ہیں۔

انہوں نے کہاکہ سب کی بیٹیاں ہیں, بیٹیاں سانجھی ہوتی ہیں،سوشل میڈیا کے اس پروپیگنڈے کو ختم ہونا چاہیے۔

ان  کاکہناتھاکہ میں نے ان سے گزارش کی ہے کہ باڈی مکمل تیاری کرکے دیں گے۔

رمضان چھیپا نے کراچی سے لاہور تک کے تمام اخراجات برداشت کرنے کااعلان کیا۔ انہوں نے کہاکہ  حمیرا میری بیٹی ہے ایک ایک رضاکار انکے دکھ میں برابر کے شریک ہیں۔

انہوں نے کہاکہ ناراضی ہر گھر میں ہوتی ہے،یہ ایک فیملی کا معاملہ ہے اسے زیادہ ڈسکس نہ کیا جائے ۔