کراچی: چیئرمین پاکستان پیپلز پارٹی بلاول بھٹو زرداری نے کہا ہے کہ کراچی کے دیرینہ پانی کے مسئلے کو حل کرنے کے لیے تمام اسٹیک ہولڈرز کو مل کر کام کرنا ہوگا۔

گٹر باغیچہ کے دورے کے موقع پر میڈیا سے گفتگو کرتے ہوئے بلاول بھٹو نے کہا کہ سندھ حکومت نے کراچی کے لیے خصوصی اقدامات کیے ہیں جن میں نئی حب کینال کا افتتاح اور واٹر ٹریٹمنٹ پلانٹس کی تنصیب شامل ہے۔

ان کے مطابق جب یہ پلانٹس فعال ہوں گے تو نہ صرف شہریوں بلکہ انڈسٹری کو بھی صاف پانی فراہم کیا جا سکے گا۔

انہوں نے کہا کہ وزیراعظم کی توجہ کراچی کے مسائل کی جانب بار بار مبذول کرائی ہے اور امید ہے کہ وزیراعظم شہباز شریف اپنے ’’شہباز اسپیڈ‘‘ کے وعدے کو پورا کریں گے۔

بلاول بھٹو کہتے ہیں کہ سندھ سمیت پنجاب، کے پی اور گلگت بلتستان کے عوام اب بھی گزشتہ تاریخی سیلاب کے اثرات بھگت رہے ہیں۔

ان کا کہنا تھا کہ قدرتی آفات پر سیاست نہیں کرنی چاہیے لیکن بدقسمتی سے ہمارے سیاسی مخالفین ایسے مواقع پر بھی سیاست کرتے ہیں۔ انہوں نے یہ بھی کہا کہ یہ وقت سیاست کا نہیں بلکہ عوام کی خدمت اور ان کی مدد کا ہے۔

بلاول بھٹو نے مزید کہا کہ صدر آصف علی زرداری کا پاک چین تعلقات میں اہم کردار ہے اور ان کا حالیہ دورۂ چین دونوں ممالک کے تعلقات کو مزید مضبوط بنانے میں سنگِ میل ثابت ہوگا۔

اس موقع پر میئر کراچی نے بھی گفتگو کرتے ہوئے کہا کہ صاف پانی کے منصوبے لگائے جا رہے ہیں اور شہریوں کے ساتھ ساتھ صنعتوں کو بھی پانی کی فراہمی یقینی بنائی جائے گی۔