ورلڈ بینک کی کنٹری ڈائریکٹر بولورما امگابازار  نے وفاقی وزیر صحت مصطفی کمال سے ملاقات کے دوران وزارتِ قومی صحت کی گزشتہ چھ ماہ کی کارکردگی کو قابلِ تحسین قرار دے دیا۔

ورلڈ بینک کے کنٹری ڈائریکٹر بولورما امگابازار نے وفاقی وزیر صحت مصطفی کمال سے ملاقات کی، جس میں پاکستان کے صحت کے شعبے کو درپیش چیلنجز اور ان کے پائیدار حل پر تفصیلی تبادلہ خیال کیا گیا۔

ملاقات کے دوران ڈایریکٹر ورلڈ بینک نے گفتگو کرتے ہوئے کہا کہ ورلڈ بینک وزارت صحت کی چھ ماہ کی شاندار  کارکردگی پر  وزارتِ صحت کے جاری منصوبوں کی بھرپور تائید اور توثیق کرتا ہے۔

اس موقع پر وفاقی وزیر صحت مصطفی کمال نے کہا کہ صحت کے شعبے میں بہت سے چیلنجز درپیش ہیں، جس کی بہتری کے لیے اصلاحات کی جارہی ہیں۔

یہ بھی پڑھیں: ورلڈ بینک نے پاکستان کے لئے 14 کروڑ 97 لاکھ ڈالر قرض کی منظوری دے دی

 مصطفی کمال نے کہا کہ دور دراز اور پسماندہ علاقوں میں ٹیلی میڈیسن کے ذریعے  طبی سہولیات کی فراہمی کے لیے پر عزم ہیں، اور مریضوں کا طبی ڈیٹا کو محفوظ رکھنے کے لیے یونیورسل میڈیکل ریکارڈز کو یقینی بنا رہے ہیں۔

ڈایریکٹر ورلڈ بینک سے ملاقات کے دوران وفاقی وزیر صحت کا کہنا تھا کہ پاکستان میں 68 فیصد بیماریاں آلودہ پانی کے باعث پیدا ہوتی ہیں، صاف پانی کی فراہمی سے 68 فی صد بیماریوں سے بچا جاسکتا ہے، جن کا حل صاف پانی کی فراہمی، عوامی آگاہی، اور مشترکہ کوششوں میں پوشیدہ ہے، اس سلسلے میں  قومی سطح پر مربوط حکمت عملی تشکیل دی جارہی ہے۔

مصطفی کمال نے کہا کہ وزارتِ صحت کا اصل کام لوگوں کو بیمار ہونے سے بچانا ہے، نہ کہ صرف ان کا علاج کرنا ہے، اسپتالوں میں مریضوں کا بوجھ روز بروز بڑھ رہا ہے، اگر ہم چاہتے ہیں کہ اسپتالوں کا رش کم ہو تو لوگوں کو بیمار ہونے سے بچانا ہو گا۔

مصطفی کمال نے کہا کہ صحیح معنوں میں ہیلتھ کیئر سسٹم وہ ہوتا ہے جو لوگوں کو بیمار ہونے سے  بچائے، وزارت صحت لوگوں کو بیمار ہونے سے بچانے کے لیے خصوصی اقدامات کو یقینی بنارہی ہے۔

واضح رہے کہ ملاقات میں  ایڈیشنل سیکرٹری ہیلتھ ڈی جی ہیلتھ بھی شریک تھے۔