وزیراعظم شہباز شریف نے کہا کہ بطور قوم ہمیں غذائی تحفظ اور موسمیاتی چیلنجز کے مقابلے کے لیے متحد ہونا ہوگا۔

وزیراعظم شہباز شریف نے عالمی یوم خوراک پر پیغام دیتے ہوئے کہا کہ پاکستان آج اقوام عالم کے ساتھ خوراک کی فراہمی کی اہمیت اجاگر کر رہا ہے، خوراک کی دستیابی یقینی بنانے کے لیے ملکی و عالمی سطح پر اقدامات ناگزیر ہیں۔

انہوں نے کہا کہ اسلام آباد:عالمی یوم خوراک کا موضوع “بہتر مستقبل اور بہتر خوراک کے لیے مشترکہ کاوشیں” انتہائی اہم ہے، کسان، عوام اور اداروں کے درمیان تعاون سے ہی غذائیت سے بھرپور خوراک کی فراہمی ممکن ہے۔

ان کا کہنا تھا کہ زراعت کی ترقی اور کسان کی خوشحالی حکومت کی اولین ترجیح ہے، غذائی تحفظ کا پہلا قدم کسان کی معاشی آسودگی اور پیشہ ورانہ استعداد میں اضافہ ہے۔

یہ بھی پڑھیں: حکومتِ پاکستان کا کسانوں کے لیے ڈیجیٹل قرضوں کا اجراء

شہباز شریف نے کہا کہ وفاقی و صوبائی حکومتیں فصلوں کے تحفظ اور بروقت ترسیل کے لیے جامع حکمت عملی پر کام کر رہی ہیں، موسمیاتی تبدیلی کے باعث فصلوں کی غیر یقینی پیداوار بڑا چیلنج بن چکی ہے، فصلوں کے نقصانات خوراک کی قلت اور کسانوں کے معاشی مسائل کا سبب بن رہے ہیں۔

ان کا یہ بھی کہنا تھا کہ پاکستان موسمیاتی اثرات سے نمٹنے کے لیے جامع لائحہ عمل پر عمل پیرا ہے، موسمیاتی چیلنجز سے نمٹنے کے لیے عالمی سطح پر مشترکہ کاوشوں کی ضرورت ہے۔

 وزیراعظم نے مزید کہا کہ حالیہ سیلاب سے فصلوں کو شدید نقصان پہنچا، حکومت ازالے کے لیے پرعزم ہے، بطور قوم ہمیں غذائی تحفظ اور موسمیاتی چیلنجز کے مقابلے کے لیے متحد ہونا ہوگا۔