اسلام آباد: صدرِ مملکت آصف علی زرداری نے کہا ہے کہ کارکنان جمہوری اتحاد برقرار رکھیں، پیپلز پارٹی روشن خیال پاکستان کیلئے پرعزم ہے۔
صدر آصف زرداری نے پاکستان پیپلز پارٹی کے 58ویں یومِ تاسیس پر اپنے پیغام میں ذوالفقار علی بھٹو شہید اور بینظیر بھٹو کو خراجِ عقیدت پیش کیا اور پارٹی کی جدوجہد کو پاکستان میں جمہوریت کی مضبوطی کا اہم ستون قرار دیا۔
انہوں نے کہا کہ پیپلز پارٹی کی جدوجہد نے آمریت کے خلاف مزاحمت اور عوامی حقوق کی بحالی میں تاریخی کردار ادا کیا۔ 1973 کا متفقہ آئین ذوالفقار علی بھٹو شہید کا قوم کے لیے عظیم تحفہ ہے۔
آصف زرداری نے کہا کہ وفاق کے استحکام، قومی یکجہتی اور گلگت بلتستان و آزاد کشمیر میں اصلاحات پیپلز پارٹی کی نمایاں خدمات میں شامل ہیں، ملک کے جوہری پروگرام کی بنیاد بھی پیپلز پارٹی نے رکھی، جو قومی سلامتی کا مضبوط ضامن ہے۔
مزید پڑھیں: پاکستان پیپلز پارٹی کا 58 واں یومِ تاسیس آج
انکا کہنا تھا کہ زمین، مزدور، تعلیم اور سماجی انصاف سے متعلق اصلاحات پارٹی کی پہچان ہیں، ایم آر ڈی سے اے آر ڈی تک، پیپلز پارٹی نے ہمیشہ جمہوری ارتقا کی قیادت کی، چارٹر آف ڈیموکریسی اور اٹھارویں ترمیم پارٹی کا تاریخی جمہوری ورثہ ہیں۔
انہوں نے کہا کہ پیپلز پارٹی ہمیشہ مزدوروں، کسانوں، خواتین اور اقلیتوں کی آواز رہی ہے، محروم طبقات کی شمولیت پارٹی کے بنیادی مشن کا حصہ ہے، خواتین اور اقلیتوں کی بااختیاری پاکستان کے روشن مستقبل کی ضمانت ہے، کارکنان جمہوری اتحاد کو برقرار رکھیں، پیپلز پارٹی ایک روادار اور روشن خیال پاکستان کے لیے پرعزم ہے۔
صدر آصف زرداری نے جمہوریت، مساوات اور سماجی انصاف کے عزم کی تجدید پر زور دیتے ہوئے کہا کہ نیشنل ایکشن پلان میں پارٹی کی شمولیت قومی استحکام کے لیے اہم ہے۔
