کرکٹ کے 12ویں عالمی کپ کے 35ویں میچ میں جنوبی افریقہ نے سری لنکا کو  باآسانی 9وکٹوں سے شکست دے دی۔

چیسٹر لی اسٹریٹ میں کھیلے  گئے میچ میں جنوبی افریقہ نے ٹاس جیت کر پہلے باؤلنگ کا فیصلہ کیا جو میچ کی پہلی گیند پر اس وقت درست ثابت ہوا جب کگیسو ربادا کی گیند پر کپتان دیموتھ کرونارتنے بغیر کوئی رن بنائے پویلین لوٹ گئے۔

جنوبی افریقہ کی ٹیم میں فاسٹ بولر ڈوین پریٹوریس کی شمولیت بھی کارآمد ثابت ہوئی جنہوں نے اپنے دس اوورز میں صرف 25 رنز دے کر تین کھلاڑیوں کو پویلین کی راہ دکھائی۔

  اس طرح سری لنکا کی پوری ٹیم تین گیندوں قبل ہی 203رنز بنا کر ڈھیر ہو گئی۔

جنوبی افریقہ کی جانب سے پریٹوریس  کے علاوہ کرس مورس نے بھی تین جبکہ ربادا نے دو وکٹیں حاصل کیں۔

آسان ہدف کے تعاقب میں جنوبی افریقی اوپنرز نے 31رنز کا آغاز فراہم کیا لیکن لاستھ ملنگا کی خوبصورت یارکر نے کوئنٹن ڈی کوک کی اننگز کے آگے فل اسٹاپ لگا دیا۔

تاہم کوئنٹن ڈی کاک کے جلدی آؤٹ ہونے کے باوجود فاف ڈو پلیسی کے عمدہ 96 اور ہاشم آملہ کے 80 رنز کی ناقابلِ شکست اننگز نے جنوبی افریقہ کو فتح سے ہمکنار کیا۔

سری لنکا کی جانب سے ایک وکٹ لاستھ ملنگا کے نام رہی۔

واضح رہے کہ جنوبی افریقہ کی ٹیم پاکستان سے شکست کے بعد اس ورلڈ کپ سے  پہلے ہی باہر ہو چکی ہے، جبکہ سری لنکا کی ٹیم کے نے اپنے حالیہ میچ میں میزبان انگلینڈ کو ہرا کر سیمی فائنل تک رسائی کی امید برقرار رکھی تھی تاہم آج کی شکست کے بعد سری لنکا کی سیمی فائنل تک رسائی مشکل دکھائی دے رہی ہے۔

سیمی فائنل میں رسائی کے لیے سری لنکا کو اب اپنے اگلے دونوں میچ جیتنے ہوں گے بلکہ باقی ٹیموں کی ناکامیوں کی امید بھی کرنی ہو گی۔