دورہ آسٹریلیا کے لیے قومی ٹی ٹوئنٹی اور ٹیسٹ ٹیم کا اعلان کردیا گیا ۔

قومی ٹیم کے ہیڈ کوچ و چیف سلیکٹر مصباح الحق نے پریس کانفرنس میں دورہ آسٹریلیا کے ٹی ٹوئنٹی اور ٹیسٹ ٹیم میں شامل کھلاڑیوں کے ناموں کا اعلان کیا۔

ٹیسٹ ٹیم کی کپتانی اظہر علی جبکہ ٹی ٹوئنٹی کی کپتانی بابر اعظم کریں گے۔

3 ٹی ٹونٹی میچز کے لیے 16 رکنی قومی ٹیم کا اعلان کیا گیا ہےجس میں کپتان بابر اعظم کے علاوہ محمد عرفان، محمد رضوان،امام الحق، خوشدل شاہ، محمد عامر، محمد حسنین، عماد وسیم، افتخار احمد، آصف علی، فخر زمان، حارث سہیل ، موسیٰ خان، شاداب خان، عثمان قادر اور وہاب ریاض شامل ہیں۔

2 ٹیسٹ میچوں کے لیے بھی 16 رکنی ٹیم کا اعلان کیا گیا ہے۔

ٹیسٹ میں تین نئے نوجوان کھلاڑیوں موسیٰ خان، نسیم شاہ ، کاشف بھٹی سمیت کپتان اظہر علی،شاہین شاہ آفریدی،شان مسعود، یاسر شاہ، افتخار احمد، محمد عباس، محمد رضوان، حارث سہیل، امام الحق ، عمران خان سینئر ، عابد علی، اسد شفیق اور بابر اعظم شامل ہیں۔

چیف سلیکٹر مصباح الحق کا کہنا تھا کہ سابق کپتان سرفراز احمد  کے خلاف کوئی سازش نہیں ہورہی ، انہیں ناقص کارکردگی پر ٹیم سے ڈراپ کیا گیا ہے۔

قومی ٹی ٹوئنٹی اسکواڈ 26 اکتوبر کو سڈنی روانہ ہوگا  جبکہ ٹیسٹ اسکواڈ میں شامل کھلاڑی قائداعظم ٹرافی کے پانچویں راؤنڈ میں شرکت کے بعد آسٹریلیا روانہ ہوں گے ۔

قومی ٹی ٹوئنٹی ٹیم سیریز سے قبل ایک وارم اپ میچ کھیلے گی  جبکہ ٹیسٹ سیریز سے قبل قومی ٹیم 2 وارم اپ میچز کھیلے گی۔