سابق جنوبی افریقی کپتان اے بی ڈی ویلیئرز کا  ٹی ٹوئنٹی انٹرنیشنل کرکٹ سے ریٹائرمنٹ واپس لے کر آئندہ برس ٹی ٹوئنٹی ورلڈ کپ میں شرکت کا قوی امکان ہے۔

ان خیالات کا ظہار جنوبی افریقی ٹیم کے موجودہ کپتان فاف ڈوپلیسی  نےمیڈیا سے گفتگو کرتے ہوئے کیا اور کہا کہ لوگ اے بی ڈی ویلیئرز کو  کھیلتے ہوئے دیکھنا چاہتے ہیں اور میں بھی  یہی چاہتا ہوں۔

 فاف ڈوپلیسی نے بتایا کہ آئندہ برس ٹی ٹوئنٹی ورلڈ کپ میں شرکت کے لیے ریٹائرمنٹ  واپس لینے کے حوالے سے اے بی ڈویلیئرز جنوبی افریقی کرکٹ  بورڈ میں اہم شخصیات سے بات  چیت کر رہے ہیں۔

فاف ڈوپلیسی کا مزید کہنا تھا کہ اس موضوع پر گفتگو کئی مہینوں سے جاری ہے۔

دو روز قبل جنوبی افریقہ کے نئے ہیڈ کوچ  مارک باؤچر نے بھی کہا تھا کہ وہ  ڈی ویلیئرز سے ٹی ٹوئنٹی ورلڈ کپ میں جنوبی افریقہ کی نمائندگی کرنے کے لیے کہیں گے۔

واضح رہے کہ جارح مزاج بلے بازی کےسبب شہرت رکھنے والے ڈی ویلیئرز نے گذشتہ برس مئی میں اچانک انٹرنیشنل کرکٹ سے ریٹائرمنٹ لے لی تھی۔

سماجی رابطے کی ویب سائٹ ٹوئیٹر پر جاری کی گئی ویڈیو میں اے بی ڈی ویلیئرز نے کہا  تھا کہ اب وہ کرکٹ سے کنارہ کشی اختیار کرنا چاہتے ہیں اور دوسروں کو موقع دینا چاہتے ہیں۔

انہوں نے کہا  تھا کہ  میں نے اپنی باری پوری کر لی اور سچ یہ ہے کہ میں اب تھک گیا ہوں۔

یاد رہے کہ ڈی دیلیئرز نے عالمی کپ سے قبل بھی ریٹائرمنٹ واپس لینے کا عندیہ دیتے ہوئے خود کو سلیکشن کے لیے  دستیاب قرار دیا تھا  تاہم اس وقت کی مینجمنٹ نے ان کی اس پیشکش کو مسترد کردیا تھا۔

اے بی ڈی ویلیئرز نے اپنے 14 سال کے عرصے پر محیط کیرئیر میں 114 ٹیسٹ میچز، 228 ایک روزہ میچز اور 78 ٹی ٹوئنٹی میچز میں اپنے ملک کی نمائندگی کی ۔

ڈی ویلیئرز نے ٹیسٹ کرکٹ میں 50 کی اوسط سے ساڑھے 8765رنز بنائے ہیں جبکہ ایک روزہ میچز میں انہوں نے 53 رنز کی اوسط سے 9577 رنز بنائے ہیں۔

ٹی ٹوئنٹی میچز میں انہوں نے 26 کی اوسط سے 1672 رنز بنارکھے ہیں۔

اس کے علاوہ ایک روزہ میچز کی تیز ترین سنچری کا ریکارڈ بھی اے بی ڈی ویلئیرز کے پاس ہے ۔انہوں نے 2015 میں ویسٹ انڈیز کے خلاف صرف 31 گیندوں پر سنچری بنائی تھی۔