پاکستان سپر لیگ ( پی ایس ایل ) 2020 کی افتتاحی تقریب میں 350 فنکار اپنے فن کا مظاہرہ کریں گے۔

تفصیلات کے مطابق  پاکستان سپر لیگ (پی ایس ایل) 2020 کی افتتاحی تقریب جمعرات کو نیشنل اسٹیڈیم  کراچی میں منعقد ہوگی جس میں 350 فنکار جلوہ گر ہوں گے۔

افتتاحی تقریب میں راک، پاپ، بھنگڑا، فوک اور علاقائی موسیقی کا تڑکا لگے گا۔تقریب میں راحت فتح علی خان، سجاد علی، ابرار الحق، صنم ماروی  ،آئمہ بیگ ،ابو محمد،فرید ایاز اور سوچ بینڈ میں شامل گلوکار اپنی آواز کا جادو جگائیں گے۔

ایچ بی ایل پی ایس ایل کے آفیشل ترانے میں شامل چاروں گلوکار عارف لوہار، علی عظمت، عاصم اظہر اور ہارون بھی افتتاحی تقریب میں جلوہ گر ہوں گے۔

Advertisement

350 artists to converge at National Stadium for #HBLPSLV opening ceremony. More: https://t.co/iIHe7CyQBP #TayyarHain pic.twitter.com/HdJEN4Gwrs

— PakistanSuperLeague (@thePSLt20) February 17, 2020

اس دوران مختلف گلوکار اپنی آواز کا جادو جگائیں گے جبکہ دیگر فنکار اپنے رقص سے تقریب کو چار چاند لگائیں گے۔

ایچ بی ایل پی ایس ایل فائیو کی افتتاحی تقریب میں شوبز سے تعلق رکھنے والی شخصیات  بھی شرکت  کریں گی۔

لیگ کے مکمل ایڈیشن کے پاکستان میں انعقاد کا جشن منانے کے لیے تقریب کےدوران آتش بازی کا بھی شاندار مظاہرہ کیا جائے گا۔

ایچ بی ایل پاکستان سپر لیگ2020 کی افتتاحی تقریب 20 جنوری بروز جمعرات کی شام 6 بج کر 45 منٹ پہ نیشنل اسٹیڈیم کراچی میں منعقد ہوگی۔

پی ایس ایل 2020 میں پہلی بار کمنٹری اردو میں نشر ہوگی

ایونٹ کی افتتاحی تقریب کے بعد دفاعی چیمپئن کوئٹہ گلیڈی ایٹرز اور 2 مرتبہ کی چیمپئن اسلام آباد یونائیٹڈ کے درمیان میچ رات 9 بجے نیشنل اسٹیڈیم کراچی میں  کھیلا جائے گا۔

اس حوالے سے ڈائریکٹر کمرشل پی سی بی بابرحامد کا کہنا  ہے کہ یہ پہلا موقع ہے کہ ایچ بی ایل پاکستان سپر لیگ کی رنگارنگ افتتاحی تقریب پاکستان میں ہورہی ہے۔

انہوں نے کہا کہ اس شاندار ایونٹ سے قبل ایک بہترین تقریب کا اہتمام کیا جارہا ہے جہاں ملک کے معروف فنکار اپنے فن کا مظاہرہ کریں گے۔

واضح رہے کہ ایچ بی ایل پی ایس ایل 2020 بیس فروری سے بائیس مارچ تک کراچی، لاہور، راولپنڈی اور ملتان میں کھیلی جائے گی۔  ایونٹ کا پہلا میچ کراچی جبکہ فائنل لاہور میں کھیلا جائے گا۔