ایچ بی ایل  پاکستان سپر لیگ (پی ایس ایل 2020 )  کے لیے کل انعامی رقم ایک ملین امریکی ڈالرز مقرر کردی گئی۔

تفصیلات کے مطابق  ایشیا کپ 2008 کے بعد پاکستان میں سب سے بڑے کرکٹ  کے میلے، ایچ بی ایل پی ایس ایل 2020 میں ایک ملین  امریکی ڈالرز کی مالیت کی انعامی رقم تقسیم کی جائیں گی۔

ایونٹ کی فاتح ٹیم  چمچماتی ٹرافی کے ہمراہ 5 لاکھ امریکی ڈالر زکی حقدار ٹھہرے گی جبکہ رنرزاپ ٹیم 2 لاکھ امریکی ڈالرز کی انعامی رقم وصول کرے گی۔

80ہزار امریکی ڈالر زمالیت کی انعامی رقم ایونٹ کے بہترین کھلاڑی، بہترین بلے باز، بہترین باؤلر اور اسپرٹ آف کرکٹ کے  ایوارڈز جیتنے والوں میں برابری کی بنیاد پر تقسیم ہوگی۔

باقی ماندہ انعامی رقم ٹورنامنٹ کے دوران  بہترین کیچ، بہترین رن آؤٹ اور سب سے زیادہ چھکے لگانے والےکھلاڑیوں کے لیے مقررہ انعامات کی مد میں تقسیم کی جائے گی۔

یاد رہے کہ 34میچز پر مشتمل 32 روزہ ایونٹ، ایچ بی ایل پی ایس فائیو آغاز 20 فروری کو کراچی سے ہوگا  جبکہ فائنل 22 مارچ کو قذافی اسٹیڈیم لاہور میں کھیلا جائے گا  ۔

ایچ بی ایل پی ایس ایل 2020 ایک ڈومیسٹک ٹورنامنٹ ہے جو ملک کے 4 مختلف شہروں میں کھیلا جائے گا۔ ایونٹ کے 9 میچز کراچی، 14 لاہور، 8 راولپنڈی اور 3 ملتان میں کھیلے جائیں گے۔

ایونٹ کا افتتاحی میچ 20 فروری کو دفاعی چیمپئن کوئٹہ گلیڈی ایٹرز اور 2 مرتبہ کی چیمپئن اسلام آباد یونائیٹڈ کے مابین کھیلا جائے گا۔میچ 9 بجے نیشنل اسٹیڈیم کراچی میں شروع ہوگا، اس سے قبل 6:45 بجے ایونٹ کی افتتاحی تقریب منعقد ہوگی۔

واضح رہے کہ ایچ بی ایل پی ایس فائیو، ایشیا کپ 2008 کے بعد پاکستان میں کرکٹ کا سب سے بڑا میلہ ہے۔

پی ایس ایل 2020 : افتتاحی تقریب میں 350 فنکار جلوہ گر ہوں گے

  بارہ سال قبل 4 ٹیسٹ کھیلنے والے ممالک کے علاوہ متحدہ عرب امارات اور ہانگ کانگ کی ٹیموں پر مشتمل ایشیاء کپ کا ایونٹ لاہور اور کراچی میں کھیلا گیا تھا جس میں کُل 13 میچز کھیلے گئے تھے۔

ایونٹ کے فائنل میں سری لنکا نے بھارت کو 100 رنز سے شکست دی تھی۔

اس سے قبل پاکستان، آئی سی سی کرکٹ ورلڈ کپ 1987 اور 1996 کے میچزکی میزبانی بھی کرچکا ہے۔

 ورلڈکپ 1987 میں پاکستان نے 7 مختلف مقامات پر 10 میچوں کی میزبانی کی تھی جبکہ  ورلڈ کپ 1996 میں پاکستان نے 6 مختلف مقامات پر 16 میچزکی میزبانی کی تھی۔