پاکستان سپر  لیگ ( پی ایس ایل)  میں شامل کئی غیر ملکی کھلاڑی کورونا وائرس کے سبب  پاکستان چھوڑنے کی تیاری کرنے لگے۔

پاکستان کرکٹ بورڈ ( پی سی بی ) کے ذرائع کے مطابق کورونا وائرس کے سبب  بورڈ نے غیر ملکی کھلاڑیوں پی ایس ایل سے دستبردار ہونے  کا آپشن دے  دیا ہے۔

ذرائع کا کہنا ہے کہ  انگلینڈ کے کھلاڑی لیگ چھوڑ کر واپس جانے  کے لیے تیار ہوگئے ہیں۔

پی سی بی ذرائع کا کہنا ہے کہ  انگلینڈ کے کھلاڑیوں نے لیگ سے دستبردار ہونے کے  لیے کہا تھا،کوئی بھی کھلاڑی لیگ سے الگ ہونے کا اختیار رکھتا ہے ۔

ذرائع کا کہنا ہے کہ اگر کوئی لوکل کھلاڑی بھی میچ نہیں کھیلنا چاہتا تو اسے اس کی اجازت ہے۔

دوسری جانب  پاکستان کرکٹ بورڈ نے پاکستان کپ کو بھی ملتوی کرنے کا فیصلہ کر لیا ہے۔

ذرائع کا کہنا ہے کہ 25 مارچ سے کرا چی میں شیڈول پاکستان کپ کی  نئی تاریخ کا اعلان جلد کیا  جائے گا۔

پی ایس ایل میچز کے لیے ایڈوائزری جاری کردی گئی

واضح رہے کہ گذشتہ روز سندھ حکومت  نے پاکستان سپر لیگ کے حوالے سے بڑا فیصلہ  کرتے ہوئے کہا تھا کہ پی ایس ایل کے میچز  اب تماشائیوں کے بغیر کھیلے جائیں گے۔

وزیر اعلیٰ سندھ  مراد علی شاہ  نے پی ایس ایل کے میچز کے حوالے سے بڑا اعلان کرتے ہوئے کہا  تھا کہ کل سے کراچی میں  ہونے والے میچز میں  تماشائیوں کے گراؤنڈ میں داخلے پر پابندی ہوگی۔

مراد علی شاہ نے کہا  تھاکہ  کل  اور دیگر  میچز بنداسٹیڈیم  میں  ہوں گے،ہم ان حالات میں میچز  کروا رہے ہیں  اس سے زیادہ رسک نہیں لے سکتے۔

اس ضمن  میں وزیراعلیٰ سندھ نے  کمشنر  کراچی  کو ہدایت   کی  تھی کہ وہ پی سی بی سے بات کر کے   فیصلے پر عملدرآمد کروائیں ۔

خیال رہے کہ دیگر ممالک میں بھی کھیلوں کی سرگرمیاں بناء تماشائیوں کے ہو رہی ہیں۔بیشتر ممالک نے کھیل، تعلیم اور ہجوم میں ہونے والی سرگرمیاں معطل کر رکھی ہیں۔