پاکستان کرکٹ ٹیم کے سابق وکٹ کیپر  راشد لطیف نے وکٹ کیپر کو ٹیم کا اہم رکن قرار دے دیا۔

تفصیلات کے مطابق سابق کرکٹرز کے موجودہ کرکٹرز کو آن لائن سیشنز کے ذریعے ٹپس دینے کا سلسلہ جاری ہے۔

وکٹ کیپرز کے لیے منعقدہ سیشن میں تبادلہ خیال کرتے ہوئے سابق ٹیسٹ وکٹ کیپر راشد لطیف کا کہنا تھا کہ وکٹ کیپر کسی بھی ٹیم کا سب سے اہم رکن ہوتا۔ وکٹ کیپر کا ایک اچھا کیچ اور رن آؤٹ ٹیم کو فتح دلاتا۔

انہوں  نے کہا کہ وکٹ کیپر کے لیے فٹنس اور اعصابی مضبوطی درکار ہوتی ہے۔سابق کپتان سرفرازاحمد ، محمد رضوان اور روحیل نذیر  اعصابی طور پر مضبوط ہیں۔

راشد لطیف نے تینوں کھلاڑیوں کو سابق انگلش وکٹ کیپرز ایلن ناٹ اور جیک رسل کی ویڈیوز دیکھنے کی ہدایت کی۔

سابق کپتان  نے کہا کہ  وکٹ کیپر کے لیے بیلنس ضروری ہے، معین خان کے پاؤں کی مضبوطی  نے ان کے کیرئیر کو طول دیا۔

انہوں نے بتایا کہ وہ میدان میں اپنے آپ کو تازہ دم رکھنے کے لیے سلپ میں کھڑے کھلاڑیوں سے گفتگو کرتے رہتے تھے۔

راشد لطیف نے تینوں کھلاڑیوں کو بیٹنگ میں نکھار کے لیے بھی ٹپس بھی دئیے۔

آن لائن سیشن میں سرفراز احمد، محمد رضوان اور روحیل نذیر نے شرکت کی۔

اس موقع پر قومی کرکٹ ٹیم کے ہیڈ کوچ اور چیف سلیکٹر مصباح الحق، باؤلنگ کوچ وقار یونس اور ٹیم منیجمنٹ کے رکن شاہد اسلم بھی  موجود تھے۔