قومی ٹی ٹوئنٹی اور ون ڈے ٹیم کے کپتان بابر اعظم نے عمران خان کی طرح اٹیکنگ کپتانی کرنے کی خواہش ظاہر کردی۔

قومی  ون ڈے اور ٹی ٹوئنٹی ٹیم کے کپتان بابر اعظم نے ویڈیو لنک پریس کانفرنس میں کہا کہ میں  کپتانی میں عمران خان والا اسٹائل رکھنا چاہتا ہوں۔ان کی طرح اٹیکنگ کپتانی کرنے کی خواش ہے۔

بابر اعظم نے کہا کہ  پی سی بی کا مشکور ہوں  کہ ٹی ٹوئنٹی کے ساتھ ون ڈے کی کپتانی  بھی سونپی۔ انڈر19 سے کپتان چلا آ رہا ہوں ، مجھ پر قیادت کا بوجھ نہیں ہے۔

انہوں نے کہا کہ کپتانی میں آپ کو خود پر اور غصے پر قابو رکھنا پڑتا ہے۔کپتانی میں یہی سکھا ہے ساتھی کھلاڑیوں کو اعتماد دیا جائے۔ کپتانی اور بیٹنگ میں بہت فرق ہے، بیٹنگ میں آپ قیادت کا نہیں سوچ رہے ہوتے۔

بابر اعظم کا مزید کہنا تھا کہ انگلینڈ دورے پر پی سی بی سب سے پہلے ہماری صحت کا خیال رکھے گا۔کورونا کے حوالے سے  آئی سی سی کے قواعد سے کھلاڑیوں کو فائدہ ہوگا۔

انہوں نے کہا کہ  بطور کرکٹر خواہش ہے کہ ٹی ٹوئنٹی ورلڈ کپ شائقین کے ساتھ ہو۔کراؤڈ کے سامنے کھیلنے سے کارکردگی کا معیار مختلف ہوتا ہے۔

بابر اعظم نےکہا کہ سینٹرل کنٹریکٹ نہ ملنے کا مطلب یہ نہیں کہ ٹیم میں جگہ نہیں ملے گی۔ وہاب ریاض اور محمد عامر سے بات ہوئی  ہے، انہیں اعتماد دیا ہے۔

ان کا کہنا تھا کہ ویرات کوہلی کے ساتھ میرا موازنہ نہ کیا جائے تو اچھا ہوگا۔ کوہلی الگ کلاس کے کھلاڑی ہیں، میں اپنا کھیل کھیلتا ہوں۔

بابر اعظم نے کہا کہ میں  کوئی انگریز تو نہیں جو ایک دم انگریزی سیکھ جاؤں،وقت کے ساتھ ساتھ انسان سیکھتا ہے، میں بھی سکیھ رہا ہوں۔