سابق قومی ٹیسٹ کرکٹر فیصل اقبال کا کہنا ہے کہ کورونا وائرس کی وباء کے بعد کرکٹ نے زبردست واپسی کی ہے۔

بول نیوز کے پروگرام  ’کرکٹ انسائٹس  آن بول‘ پر  پاکستان اور ویسٹ انڈیز کے دورہ انگلینڈ سے  متعلق تجزیہ کرتے ہوئے فیصل اقبال نے کہا کہ کورونا وباء کے بعد کرکٹ نے زبردست واپسی کی ہے۔

انہوں نے کہا کہ جو لوگ کہتے ہیں کہ ٹیسٹ کرکٹ کا اب کوئی چارم نہیں رہا  انہیں ویسٹ انڈیز اور انگلینڈ کی حالیہ ٹیسٹ سیریز دیکھنی چاہیئے۔

فیصل اقبال کا کہنا تھا کہ  اب کرکٹ بہت تبدیل ہوگئی ہے۔اب بال کو چمکانے کے لیے تھوک  کا استعمال نہیں کرسکتے۔ہینڈ سینیٹائیزر کا استعما ل ضروری ہے، سوشل ڈسٹینسنگ کا بھی خیال رکھا جارہا ہے ۔

انہوں نے مزید کہا کہ ان سب تبدیلیوں کے باوجود ٹیسٹ کرکٹ کی شاندار واپسی ہوئی ہے۔ ویسٹ انڈیز اور انگلینڈ کا پہلا ٹیسٹ میچ بہت شاندار ہوا ہے۔

فیصل اقبال نے کہا انگلینڈ کو ٹاس جیت کر بیٹنگ کا فیصلہ مہنگا پڑا۔پہلی اننگز میں خاطر خواہ کارکردگی نہ دکھانے کے باوجود انگلینڈ نے کم بیک کیا لیکن ویسٹ انڈین بالرز نے بہت زبردست بالنگ کی  اور ٹیم کو جیت سے ہمکنار کیا۔

پاکستان کرکٹ ٹیم کے حوالے سے ان کا کہنا تھا کہ قومی ٹیم کو ایڈوانٹیج حاصل ہے کہ وہ جلدی انگلینڈ پہنچ کر وہاں کی کنڈیشنز سے ہم آہنگ ہورہی ہے اور ویسٹ انڈیز کے ساتھ انگلینڈ کی سیریز دیکھ کر بھی انہیں فائدہ ہوگا۔

فیصل اقبال کا کہنا ہے کہ بغیر شائقین کے میچ ہونے سے پاکستان ٹیم کو کوئی فرق نہیں پڑے گا کیونکہ ہم تقریباًگذشتہ 20  سال سے دبئی اور شارجہ کے خالی گراؤنڈز  میں کھیلتے رہے ہیں۔