ڈھاکہ: پاکستان نے دوسرے ٹی ٹوئنٹی میچ میں بنگلادیش کو باآسانی 8 وکٹوں سے شکست دے دی ہے۔

 ڈھاکہ کے شیر بنگلا کرکٹ اسٹیڈٰیم میں آج پاکستان اور بنگلادیش کے درمیان ٹی ٹوئنٹی سیریز کا  دوسرا میچ کھیلا گیا جس میں بنگلادیش نے ٹاس جیت کر پہلے بیٹنگ کرنے کا فیصلہ کیا جبکہ پاکستان نے مقررہ ہدف 2 وکٹوں کے نقصان پر پورا کرلیا ہے۔

پہلی اننگ

بنگلادیش نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 108 رنز اسکور کیے اور پاکستان کو جیت کے لیے 109 رنز کا ہدف دیا۔

بنگلادیش کی جانب سے نجم الحسین شنٹو 34 گیندوں پر 40 رنز بناکر نمایاں رہے جبکہ عاطف حسین نے 21 گیندوں پر 20 رنز اسکور کیے۔

پاکستان کی جانب سے شاہین شاہ آفریدی اور شاداب خان نے 2،2 کھلاڑیوں کا پویلین کی راہ دکھائی جبکہ محمد وسیم، حارث روف اور محمد نواز نے 1،1 کھلاڑی کو آوٹ کیا۔

دوسری اننگ

بنگلادیش کے 109 رنز کے ہدف کے تعاقب میں پاکستان ٹیم کی جانب سے اوپننگ کا آغاز اچھا نہیں رہا اور کپتان بابر اعظم صرف ایک رن بناکر پویلین لوٹ گئے۔

بعد ازاں محمد رضوان اور فخر زمان نے اچھے کھیل کا مظاہرہ کرتے ہوئے اسکور کو 97 رنز تک پہنچا دیا جس کے بعد محمد رضوان 39 رنز بناکر امین الاسلام کی گیند پر کیچ دے بیٹھے۔

اس میچ میں بائیں ہاتھ کے بلے باز فخر زمان نے ناقابل شکست 57 بناکر میچ کو یکطرفہ کردیا اور یوں پاکستان ٹیم نے دوسرے ٹی ٹوئنٹی کے ساتھ سیریز بھی اپنے نام کرلی۔

بنگلادیش کی جانب سے امین الاسلام اور مستفیظ الرحمان نے ایک ایک کھلاڑی کو آوٹ کیا۔

واضح رہے کہ سیریز کا تیسرا ٹی ٹوئنٹی انٹرنیشنل میچ 22 نومبر کو اسی مقام پر کھیلا جائے گا جبکہ دورہ بنگلادیش کے دوران پاکستان ٹیم بنگلا دیش سے 2 ٹیسٹ میچز بھی کھیلے گی۔

ٹیسٹ سیریز کا پہلا میچ 26 نومبر سے 30 نومبر کے درمیان کھیلا جائے گا جبکہ دوسرا میچ 4 دسمبر سے شروع ہوگا جو 8 دسمبر تک جاری رہے گا۔